Azərbaycanımız növbəti tarixi günlərini yaşayır. 7 fevralda ərazisi bütöv, suverenliyi tam təmin edilmiş ölkəmizdə ilk dəfə olaraq prezident seçkiləri keçiriləcək. Bu seçkilərdə hər birimizin iştirakı çox vacibdir. Səsimiz təkcə vətəndaşlıq borcumuz yox, cəmiyyətimizin, ən əsası uşaqlarımızın gələcəyi üçün güclü vasitədir. Odur ki, seçkilərə qatılaq, uşaqlarımızın xoşbəxt gələcəyinə səs verək!
Modern.az xəbər verir ki, bunu Uşaq İnkişaf Mərkəzinin rəhbəri Aynur Musayeva bildirib.
O qeyd edib ki, əsası Ulu öndər Heydər Əliyev tərəfindən qoyulan dövlət uşaq siyasətinin Prezident İlham Əliyev tərəfindən uğurla davam etdirilməsi və son illər bu istiqamətdə əldə edilən nailiyyətlər övladlarımızın taleyində önəmli rol oynayır.
"Uşaqların hüquqlarının müdafiəsi, keyfiyyətli, əlçatan, müasir səhiyyə və təhsil xidmətləri, ümumilikdə sosial rifahın gücləndirilməsinə yönəlik addımlar bunu deməyə əsas verir. Xüsusilə, fiziki qüsurlu uşaqların diqqətdə saxlanılması, onların inkişafı, inklüzivlik sahəsində əldə etdiyimiz nəzərəçarpacaq irəliləyişlər bu siyasi yolun davam etdirilməsini vacib edir. Hazırkı siyasi rəhbərliyimizin uşaqların rifahı və inkişafı üçün güclü dəstəyi övladlarımızın xoşbəxt gələcəyinin təminatıdır. Biz səsimizi uşaqların, xüsusi qayğıya ehtiyacı olan övladlarımızın rifahını prioritet hesab edən Liderə verməklə, fiziki qabiliyyətlərindən asılı olmayaraq hər bir uşağın inkişaf etmək və tam potensialına çatmaq imkanının olduğu gələcəyə töhfə vermiş olacağıq. Biz bununla bütün üzvlərinin dəstəkləndiyi bir cəmiyyət qurmaq yolunda daha da irəliləyəcəyik. Odur ki, səsiniz vacibdir və o, fiziki qabiliyyətindən asılı olmayaraq hər bir uşağın böyük xəyallar qura biləcəyi və daha da böyük nailiyyətlər əldə edə biləcəyi bir gələcəyi formalaşdırmaq gücünə malikdir. Başqa sözlə, səsiniz uşaqların, xüsusilə fiziki qüsurlu uşaqların həyatına birbaşa təsir edən siyasət və təşəbbüslərə təsir edə biləcək gücə sahibdir. İndiki siyasi hakimiyyətin davam etdirilməsinə səs verməklə siz sadəcə olaraq siyasi partiyaya dəstək vermirsiniz. Siz buna ən çox ehtiyacı olanların həyatında nəzərəçarpacaq dəyişiklik yaradan mühüm proqramların davamlılığına və inkişafına tərəfdar olduğunuzu bəyan edirsiniz.
30 ildən çox işğal altında qalan torpaqlarımızın azad edilməsi ilə bu gün biz böyüklər kimi, uşaqlarımız da bütöv, suveren Azərbaycanın vətəndaşı olmaq qürurunu yaşayır. Anadan olan kimi “məcburi köçkün” olan, bu adla böyüyən uşaqlarımız artıq bu addan xilas olub, azadlığına qovuşan, abadlaşdırılan, yenidən qurulan doğma yurduna qayıdışın sevincini yaşayır. Qarabağ və Şərqi Zəngəzurda tikilən müasir bağça və məktəblərə gedir, burada təhsil almaq imkanına sahibdirlər. Öz tarixi diyarlarında, doğma evlərində böyüyürlər. Zəfər tariximizin bir parçası olmağın necə şərəfli bir hiss olduğunu duyur, doğma diyarının azadlığının şirinliyini dadır, vətənpərvər ruhda böyüyürlər.
Ümumilikdə, biz 7 fevralda prezident seçkilərində iştirak etməklə, yeni zəfərlərə, yeni zirvələrə doğru irəliləməyə təkan vermiş olacağıq. Ölkəmizin həyatında başlayan yeni dövrlə bağlı vətəndaşlıq mövqeyimizi bəyan edəcəyik. Seçkilərə gəlin, inkişafa, tərəqqiyə, müasirliyə səs verin. Uşaqlarınızın xoşbəxt gələcəyinə səs verin.
Səsimiz həlledicidir. Səsimiz taleyimizdir. Taleyimizə biganə qalmayaq!", - o qeyd edib.
