Azərbaycandakı Yəhudi Media Mərkəzi Bakı-Qroznı reysilə uçan “Embraer 190” təyyarəsinin vurulmasına görə Rusiyanın üzr istəməli olduğunu bəyan edib.
Mərkəzin direktoru Nəsimi Əbilov Modern.az-a bildirib ki, Rusiya dövlət səviyyəsində üzr istəməli və üzərinə düşən öhdəliyini yerinə yetirməlidir:
"Azərbaycanla İsrail arasındakı əlaqələr tək strateji tərəfdaşlığa yox, həm də tarixə söykənir. Təyyarə qəzası məsələsindən sonra İsrailin məşhur aviaşirkəti "El Al" Moskvaya uçuşları dayandırdı. Bunun iki səbəbi vardı. Birinci səbəb Azərbaycana dəstək nümayiş etdirmək idi. Digər tərəfdən, Azərbaycan təyyarəsinin təhlükəsizliyinə qarantiya yoxdursa, deməli, sabah digər ölkələrin hava gəmiləri də vurula bilər. Mülki aviasiya təyyarəsinə belə bir hücumu nəinki İsrail dövləti və dünya yəhudiləri, eləcə də bütün dünya pisləyir. Azərbaycan da daxil olmaqla, bütün dünya Rusiyanın bunu etiraf edib üzr istəməsini və müvafiq kompensasiya verilməsini tələb edir. Rusiya rəsmiləri də hələ ki istintaqın getdiyini bildiriblər. Yəni bu gün Rusiya özlüyündə bu arqumenti gətirir ki, istintaq tamamlanandan, "qara qutu"nun şifrələri açılıb tam məlumat veriləndən sonra öz mövqeyini ortaya qoyacaq.
Rusiya xarici işlər nazirinin sözçüsü Mariya Zaxarova hadisə ilə bağlı çıxış etdi və təyyarənin vurulmasını istisna etmədi. Lakin o, üzr istəmədi, sadəcə olaraq, təəssüfləndiyini bildirdi. İstənilən dövlət rəsmisinin "biz bunu istəmərik, təəssüflənirik" sözlərini şəxsən mən qəbul etmərəm. Mən yalnız dövlət və xalq qarşısında Rusiya tərəfindən üzrxahlıq edilməsini istəyirəm".
Müsahibimiz Azərbaycan xalqı kimi dünyadakı bütün yəhudilərin də təyyarə qəzasında ölənlərə görə kədərləndiyini söyləyib:
"Qroznı hərbi baxımdan təhlükəli zona da olsa, təyyarə mülkidir. Müxtəlif ölkələrdən olan dinc insanlar sərnişin idilər. Beynəlxalq mülki aviasiya konvensiyasına uyğun tələblər mövcuddur. Hər bir ölkənin mülki təyyarələrin təhlükəsizliyini təmin etmək öhdəliyi var. Bu gün Azərbaycandakı bütün yəhudi icmaları, yəhudi təşkilatları Azərbaycanın yanındadır. Azərbaycanın dərdi onların da dərdidir. Azərbaycanda, İsraildə, eləcə də dünyada yaşayan bütün yəhudilər eyni formada üzülürlər".
