Cənab Prezidentimiz İlham Əliyev və Mehriban xanım Əliyeva növbəti addım atdılar, ağır gündə yenə də millətimizin yanında oldular. Qəzada həlak olan pilotlarla və stüardessa ilə Heydər Əliyev Beynəlxalq Aeroportunda keçirilən vida mərasiminə gəldilər. Ailə üzvlərinə başsağlığı verdilər.
Aeroportda ölkə başçımızın Azərbaycan Televiziyasına müsahibəsində söylədikləri baş vermiş hadisədə dövlətimizin mövqeyinin nə qədər mükəmməl və digərlərinə örnək olduğunu, dövlət və hökumət qurumlarının necə dəqiq çalışdığını bir daha göstərdi. Müsahibədən çıxarılan başlıca nəticələr aşağıdakılardır: dövlət başçımız fövqəladə şəraitdə ideal və qətiyyətli davranış göstərdi, ortaya konkret mövqe qoydu; qəza hadisəsi haqqında gerçəkləri üzə çıxarmaqdan ötrü dəqiq təlimatlarını verdi; dövlət komissiyası yaratdı; rəsmi şəxsləri qəza yerinə göndərdi; dünya və millətimiz video və fotomaterialları gördülər; yaralılara Aktauda yardımlar edildi; cinayət işi açıldı; dövlət başçısı qəzanın gerçək səbəbinin ört-basdır edilməsinə imkan vermədi, ədaləti müdafiə etdi; Rusiya məmurlarının üstünlük təşkil etdiyi Dövlətlərarası Aviasiya Komissiyasının bu işi araşdırmasına imkan vermədi; beynəlxalq ekspertləri cəlb etdi və s..
Azərbaycan dövlətinin tələblərinin rəsmi şəkildə dekabrın 27-də Rusiya tərəfinə çatdırıldığını ölkə rəhbəri belə ifadə etdi:
“Biz öz tələblərimizi açıq şəkildə Rusiya tərəfinə bildirmişik. Dekabrın 27-də artıq bu tələblər rəsmi qaydada onlara çatdırıldı. Bu, nədən ibarətdir? Birincisi, Rusiya tərəfi Azərbaycandan üzr istəməlidir. İkincisi, öz günahını etiraf etməlidir. Üçüncüsü, günahkarları cəzalandırmalıdır, cinayət məsuliyyətinə cəlb etməlidir və Azərbaycan dövlətinə və zərərçəkən sərnişin və ekipaj üzvlərinə təzminat ödəməlidir. Bu, bizim şərtlərimizdir. Onlardan birincisi artıq dünən təmin edildi. Mən ümid edirəm ki, digər şərtlərimiz də qəbul ediləcək. Bütün bu şərtlər ədalətlidir. Burada hər hansı bir fövqəladə tələb, yaxud da ki, məsələ yoxdur və bu, beynəlxalq təcrübəyə və normal insani davranışa əsaslanır. Bax, budur. Yenə də deyirəm, Azərbaycan ictimaiyyəti məsələnin bütün tərəfləri barədə məlumatlandırılacaq və məlumatlandırılır. Dediyim şərtlər də, bunlar təbii olaraq ictimaiyyətə sizin vasitənizlə çatdırılır və yenə də deyirəm, mən ümid edirəm ki, bizim şərtlərimiz qəbul ediləcək.”
Azərbaycan rəhbərinin qətiyyətli mövqeyi öz nəticəsini verdi. Rusiya dövləti ilk addımını atdı, Vladimir Putin üzr istədi. Qalır digər tələblər. Onlar da yerinə yetirilməlidir. Əks halda itirən Rusiya olacaqdır.
Ən doğru məlumatları dövlət orqanlarımız verir, ictimaiyyətə hər şey olduğu kimi çatdırılır. Azərbaycan sözü və əməli eyni olan ləyaqətli dövlətdir.
Musa Qasımlı
Milli Məclisin sədrinin müavini
