Dünən Bakıda Ermənistan dövləti və onun silahlı qüvvələri, o cümlədən Ermənistan tərəfindən Azərbaycanın işğal olunmuş ərazilərində yaradılmış qondarma “Dağlıq Qarabağ respublikası” və onun qanunsuz silahlı birləşmələri tərəfindən Azərbaycana və Azərbaycan xalqına qarşı sülh və insanlıq əleyhinə cinayətlər, müharibə cinayətləri, o cümlədən təcavüzkar müharibə aparma, soyqırımı, əhalini məcburi köçürmə, təqib, işgəncə, hərbi soyğunçuluq və digər qanunsuz əməllərə dair cinayət işi üzrə açıq məhkəmə prosesi başlayıb.
Qeyd edək ki, Azərbaycan dövləti prosesə hüquq çərçivəsində yanaşaraq, məhkəmə önünə çıxarılan erməni milliyyətindən olan təqsirləndirilən şəxslərin tərcüməçi və vəkillə təmin olunması istiqamətində bütün lazımi tədbirləri həyata keçirib. Məhkəmə prosesinin açıq keçirilməsi prosesin düzgün və ədalətli şəkildə aparılacağını, təqsirləndirilənlərin beynəlxalq hüquq və insan hüquqları prinsiplərinə uyğun şəkildə mühakimə olunacağını deməyə əsas verir. Bu isə ona dəlalət edir ki, təqsirləndirilənlərdən hər hansı birininin günahı məhkəmədə sübut olnmazsa, onun bəraət alması barədə müvafiq qərarın veriləcəyi şübhə doğurmur.
Keçmiş deputat, Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə də Modern.az-la söhbət zamanı bu mövqeyi bölüşüb:
"Azərbaycan xalqı bunu məhkəməni çoxdan gözləyirdi. Azərbaycan torpaqları işğal edildikdən sonra 30 il müddətində erməni hərbi birləşmələri tərəfindən soydaşlarımıza qarşı saysız-hesabsız cinayətlər törədilib. Şükürlər olsun ki, 44 günlük savaşdan və antiterror əməliyyatı tam başa çatdıqdan sonra cinayətkar dəstənin bir qrup üzvü həbs edilərək Azərbaycan hüquq-mühafizə orqanları tərəfindən istintaqa təhvil verildi. Artıq onların istintaqı tamamlanıb və məhkəmə prosesi başlayıb".
Çingiz Qənizadə bu məhkəmə prosesilə baölı Azərbaycana qarşı xaricdə kampaniya başladanlara çağırış edib:
"Görünən odur ki, beynəlxalq hüquq normalarını tapdalayan, digər dövlətin ərazisinə və suverenliyinə qəsd edən, saysız-hesabsız mülki insanı qətlə yetirən cinayətkarları müdafiə edən, xaricdə erməni lobbisinin təsiri altında olan, ümumiyyətlə Azərbaycana qarşı ədalətsiz mövqedən çıxış edən və müəyyən maddi və siyasi maraqlar xatirinə Azərbaycana qarşı qərəzli münasibət bildirən, dünyada səpələnmiş bir qrup erməni və onlara yaxın olan, ermənilərdən bəhrələnən şəxslər, dövlətlər Azərbaycana böhtanlar atırlar. Onlar məhkəmə önünə çıxarılan bu şəxsləri əsir kimi qiymətləndirirlər, onların azad olunmasının tələb edirlər, amma həmin şəxslər bilməlidir ki, bu cinayətlər onların özlərinin ölkələrində baş vermiş olsaydı, onda nələr olardı, hansı tədbirlər görülərdi. Çox təəssüf ki, Xocal soyqırımını törədən, on minlərlə insanı məhv edən, kəndləri, şəhərləri dağıdan, işğal zonasında beynəlxalq hüquq normalarına zidd olaraq vandalizm həyata keçirənləri müdafiə edirlər.
Bu cinayətkarların havadarlarına müraciət edərək demək istəyirəm ki, heç nədən narahat olmasınlar, Azərbaycan hüquqi, demokratik, dünyəvi dövlətdir, burada hətta cinayətkarların belə - istər Azərbaycan, istərsə də qeyri-dövlətlərin vətəndaşları olsun, onların hüquqları qanunla qorunur".
Hüququ müdafiəçisi Ruben Vardanyanının məhkəmə prosesini nümunə göstərib:
"Elə Ruben Vardanyanın məhkəməsində gördük ki, o, özünün istədiyi vəkil və tərcüməçi ilə təmin olunub. Çox narahat olmasınlar, bu şəxslər ədalətli mühakimə olunacaq və məhkəmə hansı qərara gələcəksə, onunla da cəzalandırılacaqlar. Bu cəzalandırma prosesi özü də Azərbaycan qanunlarından kənara çıxmayacaq. Sakit otursunlar, haray-həşir qoparmasınlar, çünki bunun heç bir mənası yoxdur. Azərbaycan dövləti qüvvədə olan qanunlara uyğun olaraq bu təqsirləndirlənləri mühakimə edir və cəza da qanun çərçivəsində veriləcəkdir. Günahı olmayanlar aşkar olunarsa, onda təbii ki, digər qanunlar da qəbul olunacaq".
