Milli Məclisin deputatı Azay Quliyev Azərbaycan təyyarəsinin Rusiya tərəfindən vurulması faktı ilə bağlı Real TV-yə danışıb.
Modern.az-ın məlumatına görə, o, tamaşaçılarla aşağıdakı fikirlərini bölüşüb:
“Azərbaycan təyyarəsinin Rusiya tərəfindən vurulması faktı Qazaxıstanın açıqladığı ilkin hesabatda bir daha təsdiqini tapdı. Rusiya bundan dərhal sonra gerçəkliyi qəbul edib günahını etiraf etmək, bu cinayəti törədənləri cəzalandırmaq, dəymiş ziyanı və o cümlədən zərərçəkənlərə müvafiq kompensasiyanı ödəmək əvəzinə, məsuliyydən yayınmaq və hadisələri təhrif etmək taktikasını davam etdirir.
Əgər Rusiyanın qeyri-konstruktiv mövqeyi dəyişməzsə, o zaman Azərbaycanın irəli sürdüyü tələblərin icrasını və ən vacibi isə ədaləti təmin etmək üçün beynəlxalq məhkəməyə müraciət edəcək.
Kifayət qədər dəlil və sübut olduğuna görə beynəlxalq məhkəmə Azərbaycanın müraciətini təmin və Rusiyanın məsuliyyətə cəlb edəcəyinə şübhə yoxdur.
Ancaq hələ də Rusiyanın inkar və məsuliyyətdən yayınma siyasətindən imtina edərək məhkəmə davası açılmadan Azərbaycanın haqlı tələblərini sivil qaydada yerinə yerirməyə vaxtı var.
Azərbaycanla dostluq və qarşılıqlı maraq əsasında münasibətlərin olduğu kimi davam etməsi və pozulmaması Rusiyanın bu məsələdə hansı variantı seçəcəyindən çox asılıdır”.
