Ermənistanın baş naziri Nikol Paşinyan son vaxtlar mövqeləri güclənən Rusiyaya yaxınlaşmaq qərarına gəlib. Buna görə də də Ermənistanın Avropaya inteqrasiyasını nəzərdə tutan qanun layihəsinin qəbulunun iki ay müddətinə təxirə salınması və Moskvaya yaxınlaşmaq üçün addımların atılması, xüsusən də idarələrarası əlaqələrin bərpası ilə bağlı direktivin verilməsi haqda qərar qəbul edilib.

Modern.az-ın məlumatına görə, bu barədə “Hraparak” qəzeti yazıb.

Qeyd edilib ki, rəsmi Moskvada Paşinyanın səmimiliyinə şübhələr var və Rusiya Federasiya Şurasının sədri Valentina Matviyenkonun Ermənistana səfərinin ləngiməsi də bununla bağlıdır.
Məlumata görə, Kreml Paşinyanın niyyətlərinin reallığını yoxlamaq və Ermənistanın dəyişkən hakimiyyəti ilə gələcək əməkdaşlığın necə olacağını müəyyən etmək istəyir.

İlkin razılığa əsasən, Matviyenko Ermənistana fevralın sonunda səfər etməli idi, indi isə onun səfəri iyunun 5-6-da gözlənilir. Moskva Paşinyanın mayın 9-da Qırmızı Meydandakı paradda iştirakının təsdiqini gözləyir. Hakimiyyətdəki mənbələr onun 2023-cü ildə olduğu kimi, eləcə də 2024-cü il mayın 8-də keçiriləcək Avrasiya İqtisadi İttifaqının sammitində iştirak edəcəyinə əmindirlər.

Bundan əlavə, Matviyenkonun səfərindən əvvəl, aprelin 17-18-də Ermənistan parlamentinin sədri Alen Simonyan MDB Assambleyasının Qələbənin 80 illiyinə həsr olunmuş iclasında iştirak etmək üçün Rusiyaya səfər edəcək. Paralel olaraq Rusiya Dövlət Dumasının sədri Vyaçeslav Volodinin Ermənistana mümkün səfəri ilə bağlı danışıqlar aparılır. May ayına qədər Qafanda Rusiya konsulluğunun da açılması planlaşdırılır.