2024-cü il may ayının 24-də Qazax rayonunun işğal altında olan Bağanıs Ayrım, Aşağı Əskipara, Xeyrımlı və Qızılhacılı kəndlərinin əraziləri Azərbaycan Respublikasının Dövlət Sərhəd Xidməti tərəfindən nəzarətə götürülüb.

Həmin kəndlərin yüksək səviyyədə bərpa olunması və əhaliyə təhvil verilməsi gözlənilir.

Modern.az saytı hazırda bu kəndlərdəki son durum və görülən işlər haqda məlumat öyrənmək üçün
Qazaxın deputatı, Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidovla əlaqə saxlayıb.

O, saytımıza açıqlamasında bildirib ki, Qazaxın kəndlərinin bərpası ciddi nəzarət altındadır:

“Hesab edirəm ki, Qazax rayonunun işğaldan azad olunmuş kəndləri olduqca qısa müddətdə yüksək səviyyədə bərpa olunacaq. Həmin kəndlərin sakinləri öz yurdlarına qayıda biləcəklər. Qaçqın və köçkünlər Qazaxdan uzaqda deyillər, yaxın kəndlərdə məskunlaşıblar və səbirsizliklə bərpa işlərinin yekunlaşdırılmasını gözləyirlər. Bu məsələlər üçün büdcədən maliyyə də nəzərdə tutulub, proses layihələşdirilir, planlaşdırma aparılır və hazırlıq işləri artıq gedir. Bu, ən vacib məsələlərdən biridir”.

“Qazaxın 4 kəndi bütün Qarabağ kimi tikilib bərpa olunacaq”

Komitə sədri qeyd edib ki, azad olunan 4 kəndi qarış-qarış şəxsən gəzib:

“Həmin kəndlər Qazax rayonunun ən gözəl yaşayış məntəqələridir. Bu kəndlərdə ən ciddi problem ermənilər tərəfindən hər yerdə basdırılmış minalardır. Əslində proseslərə əngəl törədən də budur. Başqa bir maneə yoxdur. O kəndləri gəzəndə vəziyyətin nə dərəcədə təhlükəli olduğunu öz gözümlə gördüm. Düzdür, hökumət proses üzərində işləyir və əlindən gələni edir. Ancaq anlamaq lazımdır ki, bu məsələ çox çətin və mürəkkəbdir. Qazaxın 4 kəndinə insanların geri qayıtması çox şeylərdən - təmizləmə, tikinti məsələlərindən asılıdır. Hökumət artıq bu işlərə çox ciddi şəkildə başlayıb. Həm layihələrin təqdim olunması, eyni zamanda təhlükəsizliyin təmin edilməsi istiqamətində işlər gedir. Ən əsası, kəndlər ən yaxın dövrdə bərpa edilb insanlara təhvil veriləcək. Oradan olan sakinlərlə mütəmadi olaraq görüşürük. Onlar bu prosesin bitməsini səbirsizliklə gözləyirlər”.