Qurban bayramının yaxınlaşması bazarlarda xırdabuynuzlu və iribuynuzlu heyvanların satışını canlandırıb. Lakin hər bir şəxsin qurban kəsmək üçün maddi gücü yetməyə bilər. Dində, qurban kəsilməsi vacib əməllər sırasında sayılsa da, bəzi şəxslər üçün bu əməlin edilməməsi günah sayılmaz.
Heydər məscidinin imam müavini Rza Rzayev Modern.az-a bildirib ki, qurban Allahın vacib bildiyi ibadətlərdən biridir. Bu yalnız heyvan kəsmək, ət yemə mərasimi sayılmır. Bu işin özündə hikmətlər gizlənir.
Rza Rzayev qeyd edib ki, qurban sözünün mənası “yaxınlaşmaq” deməkdir. Yəni Rəbbə yaxınlaşmaq. Bir şəxs qurbanı kəsməklə Allaha olan sevgisini, yaxınlığını, fədakarlığını bildirir. Qurani-Kərimdə deyilir ki, “ Ən çox sevdiklərinizdən keçmədikcə, həqiqi imana çata bilməzsiniz.”
“Heyvanı kəsməklə nə onun əti, nə də qanı Allaha çatır. Rəbbimiz Qurani-Kərimdə buyurur ki, kəsilən heç bir ət, qan Allaha çatmaz. Allaha çatan yalnız insanların təqvasıdır” - deyə ilahiyyatçı söyləyib.
Kimlərə vacibdir?
Rza Rzayevin sözlərinə görə Allahın evini ziyarətə gedən hər bir şəxsə qurban kəsməsi vacib əməl sayılır. Lakin Həcc ziyarətinə gedə bilməyən şəxslərə( imkanı çatmayan) bu vacib deyil. Borc, kredit götürərək qurban kəsilməsi müstəhəb sayılmır. İmkanı olan olan şəxslər maddi cəhətdən zəif olan şəxslər üçün bir neçə qurban kəsə bilərlər. Və ya bir neçə şəxs toplaşaraq bunu edə bilərlər. Bizlər Yaradan üçün hər şeyin ən yaxşısını bəxş etmək üçün çalışmalıyıq.
Qurbanlıq heyvan necə olmalıdır?
İmam müavini vurğulayıb ki, alınan heyvan tam sağlam və yararlı olmalıdır. Bədənində xəstəlik, yara, nöqsan olan, yaşlı olan heyvan qurban kəsilə bilməz. Həzrəti Fatimə Allah yolunda nəyisə infaq etdiyi zaman onu səliqəli şəkildə təqdim edərdi. Bu insanlara çatmadan öncə, Allahın qüdrət əlinə çatar.
Qurban kəsilərkən, 3 yerə bölünməsi daha uyğundur. Bir hissəni kəsən şəxs, digərlərini yaxın qohum və qardaş-bacılar götürməlidir. Dəvə kəsərkən, 5-6 yaşlarında olması , inək-keçi 2-3 yaşlarında, qoyun isə 7 aylığından yuxarı olması vacibdir.
Qurban sevincdir. Bu bayramda dinin istədiyi könülləri qazanmaqdır.
Zərif Sofiyeva
