“26 may 2025-ci ildə Cənab Prezident İlham Əliyevin imzaladığı "Məhkum edilmiş bir sıra şəxslərin əfv olunması haqqında" Sərəncam 220 nəfərə şamil edilib. Onlardan 175 nəfər cəzanın çəkilməmiş hissəsindən azad edildi. Həmçinin, azadlıqdan məhrum etmə cəzasına məhkum edilmiş 25 nəfərin cəzasının çəkilməmiş hissəsi yarıyadək azaldıldı, azadlıqdan məhrum etmə cəzasına məhkum olunmuş və cəzası şərti tətbiq edilmiş 1 nəfər, azadlıqdan məhrum etmə cəzasına məhkum edilmiş və cəzalarının çəkilməsi təxirə salınmış 2 nəfər cəzadan azad edildi. Bundan başqa, azadlığın məhdudlaşdırılması cəzasına məhkum edilmiş 10 nəfər cəzanın çəkilməmiş hissəsindən azad edilib, azadlığın məhdudlaşdırılması cəzasına məhkum edilmiş 2 nəfərin cəzasının çəkilməmiş hissəsi yarıyadək azaldılıb, islah işləri cəzasına məhkum edilmiş 4 nəfər cəzanın çəkilməmiş hissəsindən, cərimə cəzasına məhkum edilmiş 1 nəfər cəzadan azad edilib. Əfv sərəncamı ölkə başçısı tərəfindən atılmış növbəti humanist addımdır. Ümumiyyətlə, əfvetmə sərəncamları yalnız hüquqi addım deyil, həm də dövlətin insan ləyaqətinə və mərhəmətə verdiyi önəmin göstəricisidir. Bu aktlar cəmiyyətin harmoniya içində yaşamasına, cinayət törətmiş şəxslərin islah olunmasına və cəmiyyətə inteqrasiyasına imkan yaradır. Əfv sərəncamları humanizm prinsipinin praktiki tətbiqi, dövlətin ədalət və insan hüquqlarına olan sadiqliyinin sübutudur”.
Bunu Modern.az-a açıqlamasında Prezident yanında Əfv Məsələləri Komissiyasının üzvü, millət vəkili Mehriban Vəliyeva bildirib.
Onun sözlərinə görə, Azərbaycan Respublikasının müstəqillik əldə etdiyi dövrdən etibarən əfv sərəncamları və amnistiya aktları humanizm və insanpərvərlik prinsiplərinə əsaslanaraq həyata keçirilib: “Ümummilli Lider Heydər Əliyev tərəfindən 1995-ci ildən başlayaraq imzalanan əfv sərəncamları ilə minlərlə məhkum cəzadan azad edilib. Azərbaycan Respublikasının Prezidenti İlham Əliyev də həmin ənənəni uğurla davam etdirərək, müxtəlif dövrlərdə əfv sərəncamları imzalayıb və bu proses hazırda da davam etdirilir. Cənab Prezidentin imzaladığı sonuncu Əfv sərəncamı sayca 71-cidir. Bu günə qədər imzalanmış Əfv sərəncamlarının 32-si Ulu Öndər Heydər Əliyev, 39-u isə Prezident İlham Əliyev tərəfindən qəbul edilib. Eyni zamanda, Müzəffər Ali Baş Komandanın təşəbbüsü ilə 2021-ci il noyabrın 5-də Milli Məclis tərəfindən “8 Noyabr-Zəfər Günü münasibətilə amnistiya elan edilməsi haqqında” Qərar qəbul edilib ki, bu da dövlətin öz siyasətində insan ləyaqətinə hörmətinin bariz nümunəsidir. Bu günədək əfv institutu 10 162 nəfərə şamil edilib və 7060 şəxs Prezident İlham Əliyevin humanist yanaşmasından faydalanmış olub. Burada məqsəd məhkumun islah edilməsi və yeni cinayətlərin törədilməsinin qarşısınının alınmasıdır. Sərəncam imzalanarkən məhkumların şəxsiyyəti, səhhəti, ailə vəziyyəti, törətdikləri cinayətlərin xarakteri və ictimai təhlükəlilik dərəcəsi, maddi zərərin ödənilməsi, cəza çəkdikləri müddət və həmin müddətdə davranışları nəzərə alınır. Məhkəmə qaydasında cəzaya məhkum edilmiş şəxslər bir qayda olaraq o halda əfv edilir ki, onun barəsində təyin edilmiş cəza tədbiri ilə məqsədə nail olunub. Yəni şəxs artıq cəmiyyət üçün təhlükəli deyil və onun cəzasının bütövlükdə çəkilməsinə ehtiyac yoxdur. Son əfvetmə aktına qədərki araşdırmaların nəticələri də məhz bu sayda insanın müvafiq kriteriyaya cavab verdiyini ortaya çıxarıb. Dövlət heç bir vətəndaşın məhkum həyatı yaşamasında maraqlı deyil. Əfvetmə qərarı fərdi qaydada müəyyən edilmiş şəxs barəsində Azərbaycan Prezidenti tərəfindən qəbul edilir. Təbii ki, bu addım Azərbaycan xalqının, cəmiyyətimizin bütövlüyünə bir işarə, vətəndaş həmrəyliyinə böyük bir töhfədir. 220 nəfərin əfv edilməsi, bir o qədər də ailənin sevinci deməkdir”.
Millət vəkili əlavə etdi ki, əlamətdar günlərdə Prezident İlham Əliyev tərəfindən çox sayda şəxsi əhatə edən Əfv sərəncamı imzalaması artıq ənənə halını alıb: “Sözsüz ki, azadlıq bu həyatda ən böyük nemətdir. Bu, Azərbaycanın hüquqi dövlət olduğunu bir daha təsdiqləyən addımdır. Cinayət törədən şəxslərin yalnız dövlətin humanizminə sığınması qanunun aliliyindən xəbər verir. Bu sərəncam beynəlxalq miqyasda da təqdir olunur və müsbət addım kimi qiymətləndirilir. Azərbaycanın insan hüquq və azadlıqlarına, hüququn aliliyinə sadiqliyi öz təsdiqini çoxdan tapıb. Ölkəmiz insan hüquq və azadlıqlarla bağlı qoşulduğu və tərəfdar çıxdığı bir çox konvensiyalara hörmətlə yanaşır. Hüquqi dövlət quruculuğu istiqamətində önəmli addımlar atan dövlətimizin başçısının humanistliyi digər ölkə başçılarına da nümunədir. Cinayət törədən şəxslərin cəzaçəkmə müəssisələrində nümunəvi davranışları və ailə vəziyyətlərini nəzərə alınaraq cəzalarından azad edilməsi onların cəmiyyətdə yararlı şəxs olmalarına şərait yaradır. Bu isə onu göstərir ki, kimliyindən, sosial və siyasi statusundan asılı olmayaraq, hər bir vətəndaş dövlətimizin qayğısı ilə əhatə olunub. Bununla bağlı aidiyyəti dövlət qurumları tərəfindən cəzaçəkmə müəssisələrinə baş çəkilərək məhkumların saxlanma şəraitinə baxış keçirilir və onların sosial adaptasiyası ilə bağlı müxtəlif proqramlar icra edilir. Ümid edirik ki, onlar ailələrinə qovuşaraq gələcəkdə cəmiyyətə inteqrasiya olunmaqla ixtisaslarına uyğun işlərdə çalışacaq, cəmiyyət üçün faydalı olacaqlar. Hesab edirəm ki, "Konstitusiya və Suverenlik İli"ndə, Müstəqillik Günü ərəfəsində imzalanan Əfv Sərəncamı yüzlərlə insan üçün böyük bir hədiyyədir. Vətəndaşlar da öz növbələrində dövlətimizin onlara göstərdiyi bu etimadı doğrultmalı, ölkəmizin inkişafı naminə çalışmalıdırlar. Əfv olunan hər bir insan Prezident İlham Əliyevin bu humanist addımından məmnundur və onlar gələcək həyatında da bundan nəticə çıxaracaqlarına, layiqli vətəndaş kimi ömür sürəcəklərinə, faydalı olacaqlarına inanırıq”.
