ABŞ və İsrailin İrana qarşı başlatdığı hərbi əməliyyatlardan sonra Yaxın Şərqdə gərginlik sürətlə genişlənərək regional müharibə təhlükəsini daha da artırıb. Tehran “qisas əməliyyatları” çərçivəsində Körfəz ölkələrində bir sıra strateji hədəflərə raket və pilotsuz uçuş aparatları ilə hücumlar həyata keçirib.
İranın cavab hücumlarından ən çox zərər çəkən ölkə Birləşmiş Ərəb Əmirlikləri (BƏƏ) olub. BƏƏ Müdafiə Nazirliyi bildirib ki, hava hücumundan müdafiə sistemləri yalnız son hücum dalğasında İrandan atılan 7 ballistik raket və 27 dronu məhv edib.
Ümumilikdə isə müharibə başlayandan bəri ölkənin müdafiə sistemləri 285 ballistik raket, 15 qanadlı raket və 1567 dronu zərərsizləşdirib. Hücumlar nəticəsində müxtəlif millətlərdən 6 nəfər həlak olub, 141 nəfər yaralanıb.
Son iki həftə ərzində digər ərəb ölkələri Küveyt, Bəhreyn, Qətər, İordaniya, Səudiyyə Ərəbistanı, Oman da İranın raket və dron hücumlarının hədəfi olub. Bütün bu göstəricilər ABŞ-nin artıq körfəz ölkələrinin təhlükəsizliyini tam təmin edə bilmədiyi təəssüratı yaradır. Məhz bu səbəbdən Körfəz ölkələrinin təhlükəsizliklə bağlı strategiyalarının dəyişməsi ehtimalı ortaya çıxır.
Modern.az-a açıqlamasında siyasi şərhçi Rufiz Hafizoğlu bildirib ki, hazırda İran maksimum aqressivlik nümayiş etdirmir:
“Hazırda Avropa İranla müharibədə ABŞ və İsraili meydandan tək qoyub. Məsələ ondan ibarətdir ki, bir vaxtlar İranın nüvə məsələsində dialoq üçün vasitəçilik edən ölkələr belə hazırda gedən proseslər fonunda dialoqun aparılması üçün çıxış belə etmirlər. Reallıq ondan ibarətdir ki, ərəb ölkələri vurulur. Mən İranın hazırda maksimum aqressivlik nümayiş etdirdiyini düşünmürəm. İran maksimum aqressivliyini daha sonrakı müddətə saxlayıb. Təəssüflər olsun ki, Azərbaycanın da vurulmasının şahidi olduq. Eyni zamanda, Türkiyə ərazisinə 3 raket atıldı. Məsələ ondan ibarətdir ki, İran rəsmiləri açıq şəkildə ABŞ-nin siyasi, iqtisadi maraqlarını bölgədə müharibə davam edərsə hədəf alacaqlarını bildirirlər. Əslində bu açıqlama İranın Naxçıvana hücumun arxasında dayandığını göstərir. Çünki Naxçıvan olduqca həssas bölgədir. Eləcə də ABŞ Naxçıvanla Azərbaycanın əsas hissəsini birləşdirəcək Zəngəzur dəhlizi ilə bağlı Azərbaycan və Ermənistanın razılığa gəlməsində uğurlu vasitəçilik missiyası həyata keçirib. Ona görə də, İran öz məntiqinə görə, buranı boş buraxa bilməzdi. Reallıq ondan ibarətdir ki, bu ərazilər də İran tərəfindən vurulub”.
Siyasi şərhçi qeyd edib ki, ABŞ İranla müharibədə istədiyinə nail ola bilməsə ərəb ölkələri təhlükəsizlik alyansında dəyişiklik olacaq:
“Bu gün ərəb mediasında da “Ərəb NATO”su məsələsi gündəmə gəlir və müzakirə olunur. Lakin “Ərəb NATO”sunun nə qədər effektiv olacağı sual altındadır. Ərəb ölkələri, bəli, dostlarımızdır, onların Azərbaycanla əlaqələri inkişaf edir. Buna baxmayaraq, Misir və İraqı çıxmaq şərti ilə digər ərəb ölkələrinin özlərini müdafiə etmək qabiliyyətləri sıfıra bərabərdir. Bu baxımdan ABŞ müharibədə istənilən nailiyyəti əldə etməyəcəyi təqdirdə, heç şübhəsiz, ərəb ölkələri təhlükəsizlik bloku axtaracaqlar. Artıq bunun startını Səudiyyə Ərəbistanı qoyub. Çünki Səudiyyə Ərəbistanı Pakistanla çox ciddi hərbi blok yaratmışdı. Hərbi əməkdaşlıq məsələsi gündəmə gəlmişdi. Və bunun domino effekti vermə ehtimalı olduqca yüksəkdir. Digər yandan, Qətər ola bilər ki, Türkiyə ilə təhlükəsizlik blokunu daha da gücləndirsin”.
