Rusiya Prezidenti Vladimir Putin Təhlükəsizlik Şurasının daimi üzvləri ilə görüşdə ABŞ Prezidenti Donald Trampın Qrenlandiyanı almaq niyyətindən danışıb və onun dəyərini Alyaska nümunəsi ilə qiymətləndirib.
Modern.az xəbər verir ki, Putinin sözlərinə görə, Rusiya Qrenlandiyada baş verənlərlə qətiyyən maraqlanmır.
Eyni zamanda, Rusiya Prezidenti Moskvanın Vaşinqtonla oxşar məsələləri həll etmək təcrübəsi olduğunu xatırladıb.
"19-cu əsrdə, bildiyimiz kimi, Rusiya Alyaskanı ABŞ-a satdı və ABŞ onu bizdən aldı. Və əgər yadımdadırsa, Alyaskanın sahəsi təxminən 1.717.000 kvadrat kilometrdir, bir az daha çox. ABŞ Alyaskanı bizdən 7,2 milyon dollara alıb. Əlbəttə ki, bu rəqəmlər təsdiqlənməlidir, amma düşünürəm ki, bu, təxminən doğrudur. Bugünkü qiymətlərlə, bütün bu onilliklər ərzində inflyasiya nəzərə alınmaqla, bu rəqəm 158 milyon dollar olardı", - Putin deyib.
Onun sözlərinə görə, Qrenlandiyanın ərazisi bir qədər böyükdür:
"Məncə, 2.166.000 kvadrat kilometr və bir az daha çoxdur.
Bu, təxminən 449.000-450.000 kvadrat kilometr fərqdir. Bunu ABŞ-ın Alyaskanı əldə etməsinin dəyəri ilə müqayisə etsək, Qrenlandiyanın qiyməti təxminən 200-250 milyon dollar olardı".
Putin deyib ki, o dövrdəki qızıl qiymətləri ilə müqayisədə bu rəqəm daha yüksək, yəqin ki, 1 milyarda yaxın olardı.
“Amma düşünürəm ki, ABŞ bu rəqəmi ödəyə bilərdi. Ən əsası, Danimarka və ABŞ-ın da bu mövzuda təcrübəsi var. Danimarka 1917-ci ildə Virgin adalarını satıb və ABŞ onları alıb. Deməli, onların da bu təcrübəsi var.
Yeri gəlmişkən, Danimarka həmişə Qrenlandiyaya bir müstəmləkə kimi yanaşıb və ona qarşı olduqca sərt, bəlkə də qəddar olub. Amma bu, tamamilə fərqli bir məsələdir və hazırda heç kimin marağında deyil. Düşünürəm ki, onlar bu məsələni öz aralarında həll edəcəklər", - Rusiya Prezidenti bildirib.
