Ermənistanda vəzifəli şəxslərin qohumları ilə əlaqəli şirkətlər dövlət satınalmalarında və tenderlərdə iştirak etməkdən məhrum ediləcək.
Modern.az xəbər verir ki, qanuna düzəliş layihəsi hökumət tərəfindən təsdiqlənib.
Avropa ölkələrinin təcrübəsi əsasında hazırlanmış qanun layihəsi dövlət satınalmalarında maraqların toqquşmasının qarşısını almağı hədəfləyir.
Üç səviyyəli məhdudiyyətlər sistemi təklif olunur:
- Ölkənin ali rəhbərliyi (Baş nazir, Prezident, Parlamentin sədri, Baş nazirin müavinləri və Maliyyə naziri) ilə əlaqəli şirkətlər dövlət satınalmalarında iştirak etməkdən tamamilə məhrum ediləcək.
- Nazirlər, Baş prokuror, istintaq orqanlarının rəhbərləri və ictimai liderlərlə əlaqəli şirkətlər öz departamentləri və tabeliyindəki təşkilatlar üçün tenderlərdə iştirak etməkdən məhrum ediləcəklər.
- Müstəqil dövlət qurumlarının (Mərkəzi Bank, Dövlət Xidmətlərinin Tənzimlənməsi Komissiyası, Rəqabət Komissiyası və Ombudsman) idarə olunması ilə əlaqəli şirkətlər üçün məhdudiyyətlər yalnız bu qurumlar tərəfindən satınalmalara şamil ediləcək.
Şirkət maraqların toqquşmasını gizlədirsə, müqavilə geriyə doğru ləğv ediləcək və cərimə müqavilə məbləğinin 20%-ni təşkil edəcək. Məhdudiyyətlər hazırda parlament üzvlərinə şamil edilmir, lakin məsələ parlamentdə müzakirə oluna bilər.
Hökumət dəyişikliklərin 1 yanvar 2027-ci il tarixində qüvvəyə minməsini planlaşdırır.
