ABŞ Ədliyyə Nazirliyi Ceffri Epşteyn işi ilə bağlı milyonlarla daxili sənədi ictimaiyyətə açıqlayıb.
Modern.az-ın məlumatına görə, sənədlər mərhum maliyyəçi və cinsi cinayətlərə görə məhkum edilmiş Ceffri Epşteynin siyasət, maliyyə, akademik və biznes dairələrində tanınmış şəxslərlə uzun illər ərzində əlaqələr saxladığını göstərir.
Qeyd olunur ki, Epşteyn 2019-cu ildə azyaşlıların cinsi istismarı və insan alveri ittihamları ilə yenidən həbs edilmiş, həmin il Nyu-Yorkda həbsxana kamerasında ölü tapılmışdı. Ölüm hadisəsi rəsmi olaraq intihar kimi qeydə alınıb. Ədliyyə Nazirliyi açıqlanan materiallarda saxta görüntülər və təsdiqlənməmiş iddiaların ola biləcəyi barədə xəbərdarlıq edib, eyni zamanda qurbanların şəxsiyyətini ifşa edən minlərlə sənədin siyahıdan çıxarıldığını bildirib. Nazirliyin rəhbərliyində ikinci şəxs olan Todd Blanş sənədlərdə adı keçən şəxslərin avtomatik olaraq cinayətdə ittiham edilə bilməyəcəyini vurğulayıb.
Sənədlərdə adı çəkilən ən tanınmış şəxslərdən biri ABŞ prezidenti Donald Trampdır. Bildirilir ki, Tramp 1990–2000-ci illərdə Epşteynlə sosial münasibətlər saxlayıb. Sənədlərə Trampın bir neçə qadınla birlikdə çəkilmiş fotoları və ona aid olduğu iddia edilən qeydlər də daxildir. Epşteynin yaxın çevrəsinə daxil olan Gislain Maksvell işi üzrə 2021-ci il məhkəməsində Trampın Epşteynin təyyarəsi ilə bir neçə dəfə uçduğu iddia edilib. Tramp isə bu məlumatları təkzib edərək Epşteynlə əlaqələri 2000-ci illərin əvvəlində kəsdiyini bildirib.
Keçmiş ABŞ prezidenti Bill Klintonun da adı sənədlərdə yer alır. Məlumata görə, Klinton vəzifədən getdikdən sonra Epşteynlə ünsiyyətdə olub və onun təyyarəsi ilə bir neçə dəfə səfər edib. Klinton hər hansı qanunsuzluqda iştirak etdiyini inkar edir və Epşteynlə əlaqələrinə görə peşmanlığını ifadə edib.
Böyük Britaniyanın kral ailəsinin üzvü olmuş Şahzadə Endryu (Endryu Mauntbatten-Bindsor) da sənədlərdə yer alan fiqurlar sırasındadır. O, Epşteynlə münasibətlərinə görə kral titullarından məhrum edilib və 2022-ci ildə Epşteynin qurbanlarından birinin iddiası üzrə məhkəmə işini razılaşma yolu ilə başa çatdırıb.
Materiallarda ABŞ-ın ticarət naziri Hovard Lutnik, milyarder iş adamı İlon Mask, keçmiş maliyyə naziri və Harvard Universitetinin sabiq prezidenti Larri Sammers, Federal Ehtiyat Sisteminin rəhbərliyinə namizəd Kevin Uorş, ABŞ prezidentinin həyat yoldaşı Melaniya Tramp, “Microsoft” şirkətinin qurucusu Bill Qeyts, bank sektorunun tanınmış simalarından Cess Steyli, Böyük Britaniyalı siyasətçi Piter Mendelson və sağlam həyat tərzi bloqeri Piter Attia ilə bağlı da müxtəlif yazışmalar və fotolar yer alır.
Adı çəkilən şəxslərin əksəriyyəti Epşteynin cinayətlərindən xəbərdar olduqlarını inkar edir və əlaqələrin rəsmi, sosial və ya xeyriyyə xarakteri daşıdığını bildirir. ABŞ Ədliyyə Nazirliyi isə sənədlərin istintaq materialı olduğunu və hər bir faktın ayrıca hüquqi qiymətləndiriləcəyini vurğulayır.
