İran Ali Milli Təhlükəsizlik Şurasının katibi Əli Laricani müharibənin ilk 8 günü ilə bağlı vəziyyəti qiymətləndirib.
Modern.az “Tasnim”Agentliyinə istinadən xəbər verir ki, Laricani ABŞ və İsrailin əsas məqsədindən bəhs edib: “Onların əsas məqsədi İranı parçalamaq idi”.
Laricani ABŞ-ın səhv hesablama apardığını qeyd edib:
“Mənim fikrimcə, amerikalıların əsas problemi Qərbi Asiya bölgəsini, xüsusən də İranı düzgün tanımamalarıdır. Onlar Venesuela kimi bəzi ölkələrdə yaşadıqları eyni nümunələrin İranda təkrarlana biləcəyini düşünürdülər".
Laricani bildirib ki, ABŞ və İsrail İran xalqının ruhunu ağır bir şok yaratmaqla qırmaq istəyirdilər:
"Amma bu baş vermədi; çünki İran xalqının dərin tarixi və mədəni təcrübələri var. Aşura mədəniyyəti və Hüseyn (ə) dastanı İran cəmiyyətində kök salmışdır... Aşura hadisəsindəki eyni ruh İran xalqında da görünür”.
Laricaninin sözlərinə görə, ABŞ-ın strategiyası əvvəlcə rəhbərliyin və hərbi komandirlərin öldürülməsi ilə İranın inzibati və hökumət strukturunu ağır bir zərbə ilə xaosa salmaq idi:
“Onlar bu prosesin çox tez baş verəcəyini və qısa, lakin şiddətli bir müharibənin baş verəcəyini düşünürdülər. Amerikalılar bəzi ölkələr kimi İranın bir zərbə ilə çökəcəyini düşünürdülər, amma praktikada bu müharibədə ilişib qaldılar.
Növbəti addımda onlar xalqın həyat şəraitinin çökməsini gözləyirdilər; Onların fikri yanacaq, təchizat və qurğuların xalqa çatmayacağı və ölkədə böhran yaranacağı idi.
Lakin hökumət və nazirlər geniş səylər göstərdilər və xalqın ehtiyaclarını ödəyə bildilər”.
Əli Laricani ABŞ-ın İranda etnik qrupları mərkəzi hakimiyyətə qarşı qalıdra bilmədiyini də deyib:
“Onların digər planları bəzi etnik qrupları təhrik etməyə və ölkədə separatizm üçün zəmin yaratmağa çalışmaq idi. Məsələn, onlar kürd bölgələrindəki bəzi qruplarla əlaqə qurmağa və onları hökumətə qarşı təşviq etməyə çalışdılar. Kürdlər isə İranda çox dərin kök salmış bir etnik qrup olsalar da, zamanla bəzi fikir ayrılıqları yarana bilər, lakin bu etnik qruplar Amerikanın Suriya da daxil olmaqla, region ölkələrində nələr etdiyini çox yaxşı bilirlər və bu səbəbdən belə planlara aldanmayıblar.
Amerika rəsmiləri hətta bu qrupların bəziləri ilə əlaqə saxlayaraq dəstək vəd etdilər, lakin çoxlarına bu vədlərin aldadıcı olduğu və bu ssenarinin də gerçəkləşmədiyi aydın idi.
Ona görə də iranlılar İranın bölünməsi kimi bir məsələdə heç bir xarici güclə əməkdaşlıq etməyəcəklər”.
Ə.Laricani deyib ki, İran qonşuları ilə dostdur, lakin ölkəyə qarşı hücumların həyata keçirildiyi bazalar cavabsız qalmayacaq:
“Bu müharibədə ABŞ-a baza verilərsə və oradan İrana qarşı əməliyyat aparılarsa, İslam Respublikasının cavab vermək hüququ var və bu, qanuni və müzakirə olunmayan bir hüquqdur. Region ölkələri bilməlidirlər ki, həm İranla həmfikir olduqlarını bəyan edə, həm də bazaların İrana qarşı istifadəsinə icazə verə bilməzlər".
