ABŞ və İsrailin fevralın 28-də İrana qarşı başladığı hücumlardan sonra Yaxın Şərqdə ölənlərin sayı iki mini keçib.
Modern.az xəbər verir ki, müxtəlif ölkələrdən açıqlanan rəsmi məlumatlara görə, müharibə nəticəsində regionda minlərlə insan həyatını itirib.
İranın dövlət mediasının son məlumatına görə, ölkədə azı 1270 nəfər həlak olub. Lakin İranın BMT-dəki səfiri martın 6-da bildirib ki, müharibə başlayandan bəri ölənlərin sayı ən azı 1332 nəfərə çatıb. Bu rəqəmlərə martın 4-də ABŞ-ın Şri-Lanka sahilləri yaxınlığında İran hərbi gəmisinə hücumu nəticəsində öldüyü deyilən 104 nəfərin daxil olub-olmadığı isə məlum deyil.
İsraildə isə indiyədək 12 nəfərin öldüyü bildirilir. Onlardan doqquzu martın 1-də İranın Yerusəlim yaxınlığındakı Beyt-Şemeş şəhərinə raket zərbəsi nəticəsində həlak olub. Bundan əlavə, İsrail ordusu Livanın cənubunda iki hərbçisinin öldüyünü açıqlayıb.
ABŞ tərəfi 13 hərbçisinin öldüyünü bildirib. Onlardan altısı cümə günü ABŞ hərbi təyyarəsinin İraq üzərində qəzaya uğraması nəticəsində həyatını itirib. Digər yeddi hərbçi isə İrana qarşı əməliyyatlar zamanı döyüşdə həlak olub.
Livan hakimiyyətinin məlumatına görə, İsrailin zərbələri nəticəsində ölkədə azı 687 nəfər ölüb. Ümumdünya Səhiyyə Təşkilatı bildirir ki, ölənlər arasında ən azı 98 uşaq var.
Fars körfəzi ölkələrində də itkilər qeydə alınıb. İranın hücumları nəticəsində bu ölkələrdə təxminən 20 nəfərin öldüyü bildirilir. Onların arasında Səudiyyə Ərəbistanının paytaxtı Ər-Riyadın cənub-şərqində yerləşən Əl-Xarc şəhərində yaşayış məntəqəsinə düşən mərmi nəticəsində ölən iki nəfər də var.
Regionda qarşıdurma davam etdiyi üçün ölənlərin sayının artacağı ehtimal edilir.
Qeyd edək ki, rəqəmlər müxtəlif mənbələrə əsaslanır və bu məlumatları rəsmi şəkildə təsdiqləmək mümkün olmayıb.
