Rusiya məhkəməsi "Krokus Siti Holl"da törədilən terror aktının dörd iştirakçısına ömürlük həbs cəzası verib.
Modern.az xəbər verir ki, bu barədə "İnterfaks"ın məlumatında bildirilib.
Dalerdjon Mirzoyev, Səidakram Raçabalizoda, Şəmsiddin Fariduni və Muhammadsobiru Fayzova ömürlük həbs cəzası verilib. Onlar terror aktı törətməkdə, terror fəaliyyətinə kömək etməkdə, terror fəaliyyəti törətmək məqsədilə təlim keçməkdə və digər cinayətlərdə təqsirli biliniblər.
Məhkəmə həmçinin onların hər birini 990.000 rubl məbləğində cərimə edib. Onlar cəzalarını xüsusi rejimli cəzaçəkmə müəssisəsində çəkəcəklər.
Bundan əlavə, məhkəmə terror aktı işi üzrə daha 11 təqsirləndirilən şəxsi ömürlük həbs cəzasına məhkum edib. Bunlar Umedjon və Mustakim Soliyevlər, Şahromdjon Qadoyev, Zubaydullo İsmoilov, Hüseyn Həmidov, Muhammad Şaripzoda, Yakubdjoni Yusufzoda, Nəzrimad Lütfulloi, Cumaxon Kurbonov, Hüseyn Medov və Cəbrayıl Auşevdir.
Digər dörd təqsirləndirilən şəxs 19 il 11 aydan 22,5 ilə qədər həbs cəzasına məhkum edilib.
"Krokus Siti Holl"dakı terror aktı 22 mart 2024-cü ildə törədilib. Terrorçular kompleksə “Piknik” qrupunun konsertinin keçirilməsi planlaşdırıldığı vaxt basqın ediblər. Onlar “Krokus” müştərilərinə və işçilərinə atəş açıblar, sonra konsert zalını yandırıblar. Nəticədə 150 nəfər həlak olub.
Hücumun dörd birbaşa günahkarı ilə yanaşı, onların 15 nəfər əlbir olduğu iddia edilən şəxs də iş üzrə ittiham olunub.
İslam Dövlətinin Əfqanıstandakı qanadı olan “Vilayət Xorasan” qruplaşması hücuma görə məsuliyyəti öz üzərinə götürüb. Rusiya Prezidenti Vladimir Putin terrorçuların Ukraynanın maraqları naminə hərəkət etdiyini iddia edib.
Qeyd edək ki, "Krokus City Hall”ın sahibi Rusiyada fəaliyyət göstərən iş adamı Araz Ağalarovdur.
