"Qarabağ"ın Almaniyanın "Ayntraxt" komandası ilə Çempionlar Liqası çərçivəsindəki oyununda bir ilk yaşanmışdı. Belə ki, müdafiəçi Bəhlul Mustafazadə matçın 90+4-cü dəqiqəsində vurduğu qolla Çempionlar Liqasının əsas mərhələsində qol vuran ilk Azərbaycan vətəndaşı kimi tarixə düşüb.
Lakin Bəhlul Mustafazadə Çempionlar Liqasının əsas mərhələsində qol vuran ilk azərbaycanlı deyil.
Modern.az-ın məlumatına görə, əslən azərbaycanlı futbolçu Ramiz Məmmədov 1995-ci ildə "Spartak"ın heyətində "Rusenburq"a vurduğu qol ilə UEFA Çempionlar Liqasının qrup mərhələsində qol vuran ilk azərbaycanlı kimi tarixə düşüb.
Ramiz Məmmədov kimdir?
Ramiz Məmmədov 21 avqust 1972-ci ildə Moskvada anadan olub. Atası Mehman Məmmədov milliyətcə azərbaycanlıdır, əslən Gürcüstanın Yuxarı Qarabulaq kəndindəndir. Anası isə milliyətcə rusdur.
Klub karyerası
Ramiz Məmmədov Moskvanın “Spartak” klubunun yetirməsidir. O, 1992–1998-ci illərdə bu komandanın heyətində çıxış edərək 5 dəfə Rusiya çempionu olub.
1998–1999-cu illərdə “Arsenal” (Tula) və “Krılya Sovetov” (Samara) klublarında forma geyinib. Daha sonra “Dinamo Kiyev” klubuna keçib və burada Ukrayna çempionatının qalibi olub.
2000-2001-ci illər mövsümündə Avstriyanın “Şturm Qrats” klubunda çıxış edib. 2002-ci ildə isə “Volqar” klubu ilə müqavilə imzalayıb.
2003-cü ildə Rusiyaya qayıdaraq “Luç-Energiya” klubunun heyətində Rusiya İkinci Divizionunun Şərq zonasında çempionluq qazanıb (kiçik qızıl medal-red). Bundan sonra peşəkar futbolçu karyerasını başa vurub.
O, Rusiya Premyer Liqasında 139 oyunda 7 qol vurub.
Milli komanda
Ramiz Məmmədov 1994-1998-ci illərdə Rusiya milli komandasının heyətində 10 oyun keçirib. Milli komandadakı debütünü 17 avqust 1994-cü ildə Avstriya yığmasına qarşı edib.
O, Birinci Divizion klubunun futbolçusu kimi Rusiya millisində çıxış edən ilk oyunçu kimi tarixə düşüb. Belə ki, 18 noyabr 1998-ci ildə “Arsenal” (Tula-red.) klubunun futbolçusu olarkən Braziliya millisinə qarşı oyunda iştirak edib.
Nailiyyətləri
Beş dəfə Rusiya Çempionatının qalibi olub: 1992, 1993, 1994, 1996, 1997;
Rusiya çempionatının bürünc medalçısı: 1995;
Rusiya Kubokunun qalibi: 1995/1996;
Ukrayna çempionatının qalibi: 1999/2000;
Rusiya İkinci Divizionu, Şərq zonasının çempionu;
R.Məmmədov Rusiya Futbol Federasiyasının tərtib etdiyi “Rusiya çempionatının ən yaxşı 33 futbolçusu” siyahısına daxil edilib (4 dəfə).
