Antalya və onun məşhur turizm bölgəsi Alanya martın 27–28-də keçiriləcək Alanya Ultra Trail yarışına ev sahibliyi edəcək.
Modern.az xəbər verir ki, günəşli Türk Rivierası və Tavr dağları arasında uzanan marşrutlarda təşkil olunan bu beynəlxalq dağ qaçışı yarışına dünyanın müxtəlif ölkələrindən idmançılar qatılacaq.
2017-ci ildən keçirilən və International Trail Running Association (ITRA) tərəfindən tanınan yarış artıq 34 ölkədən yüzlərlə atletin iştirak etdiyi nüfuzlu idman tədbirlərindən birinə çevrilib.
Yarış “Tradition to Trail” (“Ənənədən cığıradək”) şüarı ilə baş tutacaq və Türkiyə Turizmin Təbliği və İnkişafı Agentliyi ilə Türkiyə Gənclər və İdman Nazirliyinin dəstəyi ilə keçiriləcək.
Tədbir iştirakçılara təkcə idman yarışı deyil, həm də bölgənin təbii və tarixi gözəlliklərini kəşf etmək imkanı təqdim edir. Qaçış marşrutları qədim köç yolları ilə uzanaraq Alanya qalası, Alanya tərsanəsi və Qızıl Qüllə kimi tarixi məkanların yanından keçir və finiş xətti məşhur Kleopatra çimərliyində yerləşir.
Yarış müxtəlif hazırlıq səviyyəsinə malik iştirakçılar üçün bir neçə məsafədən ibarətdir: Alanya Ultra Trail (68 km), Taurus Mountain Trail (42 km), Keykubat Mountain Run (27 km) Cleopatra Short Trail (18 km) və Alanya Castle Run (5 km).
Aralıq dənizi sahilində yerləşən Antalya və Alanya zəngin tarixi irsi, möhtəşəm təbiəti və məşhur çimərlikləri ilə tanınır. Bu xüsusiyyətlər Alanya Ultra Trail yarışını idman, turizm və macəranı bir araya gətirən unikal beynəlxalq tədbirə çevirir.
