Oktyabrın 23-də saat 15:41 radələrində Türkiyənin Şərqi Anadolu bölgəsində episentri Van şəhəri olmaqla rixter cədvəlilə 7.2 gücündə zəlzələ baş verib. İlkin məlumata görə, dəhşətli yeraltı təkanlar nəticəsində 100-dək adam həlak olub və çoxlu yaralanan var. Bir çox binalar uçub. Dağıntılar altında qalanlar olduğundan ölənlərin sayının artacağı istisna edilmir.
Yerin 5 km dərinliyində baş verən zəlzələ 25 saniyə davam edib.
Zəlzələ Türkiyənin Ərzurum, itlis, Bingöl, Diyarbəkir, İğdır, Şanlıurfa, Qars, Ərdahan, Ağrı bölgələrində də hiss olunub.
Boğaziçi Universiteti Şamlı Rəsədxanası və Zəlzələ Araşdırma İnstitutunun müdiri, professor Mustafa Erdik bildirib: “Təxmini can itkinlərinə baxsaq, bunlar bizim heç istəmədiyimiz rəqəmlərdir... Bizim təxminimiz 710 ətrafında, amma bu 500 də ola bilər, 1000 də ola bilər. Bunlar çox təxmini rəqəmlərdir”.
Yeraltı təkanlar Azərbaycan ərazisində - Naxçıvanda da hiss olunub. Respublika Seysmoloji Xidmətdən verilən məlumata görə, Naxçıvanda hiss olunan zəlzələ 3- 3,5 bal gücündə olub və hər hansı dağıntı müşahidə edilməyib.
Modern.az
