Fevralın 21-də Mehriban Əliyevanın Azərbaycan Respublikasının birinci vitse-prezident təyin edilməsinin 2 ili tamam olub.
Azərbaycanın birinci xanımı, Heydər Əliyev Fondunun prezidenti Mehriban Əliyeva Prezident İlham Əliyevin 21 fevral 2017-ci il tarixli sərəncamı ilə Azərbaycan Respublikasının birinci vitse-prezident təyin edilib.
Azərbaycan Milli Məclisin deputatları Modern.az-a Mehriban Əliyevanın birinci vitse-prezident postuna təyinatı barədə danışıblar
Milli Məclisin Mədəniyyət komitəsinin sədr müavini Jalə Əliyeva deyib ki, Mehriban Əliyevanın ötən dövr ərzində və birinci vitse-prezidentliyi dövründə Azərbaycan dövləti, cəmiyyəti üçün gördüyü işlər əvəzolunmazdır:
“Mehriban xanım ictimai-siyasi fəaliyyəti ilə ölkəmizin hər bir vətəndaşının qayğısını çəkən ana simvoluna çevrilib. Mehriban Əliyevanın çox yüksək təşkilatçılıq bacarığı da mövcuddur. Belə ki, Birinci Avropa Oyunlarının, İslam Həmrəylik Oyunlarının yüksək və peşəkar səviyyədə təşkili və həyata keçirilməsində Təşkilat Komitəsinin rəhbəri kimi Mehriban Əliyevanın böyük və əvəzolunmaz əməyi olub. Bundan əlavə, Azərbaycanın ən ağrılı problemi olan Dağlıq Qarabağ münaqişəsi, azərbaycanlılara qarşı törədilən genosidin dünyada tanıdılmasında Mehriban xanım Əliyevanın rolu böyükdür. “Xocalıya ədalət” kampaniyası çərçivəsində Azərbaycan həqiqətlərinin dünyaya yayılması üçün aparılan işlər xüsusi əhəmiyyət daşıyır. Qısa müddət ərzində bir çox çox ölkə Xocalı qətliamını rəsmən soyqırımı kimi qəbul edib. Əlbəttə, bu onun gördüyü işlərin bir qismidir”.
Deputat Mehriban Əliyevanın Milli Məclisdəki fəaliyyət dövründən də danışıb:
“Mehriban Əliyevanın Milli Məclisin deputatı kimi də fəaliyyəti peşəkarlıq və səmərəlilik baxımından xüsusilə diqqətəlayiq olub. O, 2005, 2010 və 2015-ci illərdə Milli Məclisin deputatı seçilib. Mehriban xanım həm də 2004-cü ildən Yeni Azərbaycan Partiyası Siyasi Şurasının üzvüdür. 2013-cü ildən isə partiyanın sədr müavinidir. Milli Məclisdəki fəaliyyəti dövründə Mehriban xanım humanizm prinsiplərinə sadiqliyini dəfələrlə sübut edib. Onun təşəbbüsü ilə 2007, 2009, 2013 və 2016-cı illərdə Milli Məclis tərəfindən amnistiya aktları qəbul olunub. Bu amnistiya aktlarında ümumilikdə 30 mindən çox məhkum müxtəlif növ cəzalardan azad edilib”.
Jalə Əliyeva bildirib ki, Mehriban Əliyeva bu gün bütün dünyaya xarici gözəlliklə daxili böyüklüyün vəhdətini nümayiş etdirir.
“Təsadüfi deyil ki, Mehriban xanım birinci vitse-prezident təyin edildikdən sonra ilk iclasını qaçqınların və məcburi köçkünlərin problemləri istiqamətində qurdu. Onların problemlərinin vaxtında və yüksək səviyyədə həll edilməsi ilə bağlı tapşırıqlar verdi. Daha sonra qaçqınlar və məcburi köçkünlər üçün tikilmiş yeni binaların açılış mərasimlərində iştirak etdi. Bütün bunlar bir daha göstərir ki, Azərbaycanın birinci vitse-prezidenti çox humanist və vətəndaşların qeydinə qalan şəxsiyyətdir. Bütün bunlar ölçüyə sığmayan addımlardır. Bu, hər kəsin nail ola bilmədiyi yüksək insani keyfiyyətdir. Bütün bunlar Mehriban xanımı bütün dünyanın birinci xanımlarından, qadınlarından fərqləndirən əhəmiyyətli keyfiyyətdir”.
Deputat Mehriban Əliyevanı I vitse-prezident təyin edilməsinin ikinci ili münasibətilə təbrik edib.
“Mehriban xanıma uzun ömür can sağlığı arzu edirəm. Cənab prezidentlə birlikdə addımladığı şəxsi və siyasi həyatında ona çox böyük uğurlar arzulayıram”.
Milli Məclisin Elm və təhsil komitəsinin üzvü Sona Əliyeva qeyd edib ki, Mehriban Əliyevanın fəaliyyətinin əsasında xalq sevgisi, vətənpərvərlik, humanizm dayanır.
“Mehriban xanımın maddi və qeyri-maddi irsimizin qorunması, Azərbaycan gerçəkliklərinin, Dağlıq Qarabağ münaqişəsi haqqında həqiqətlərin dünya ictimaiyyətinə çatdırılması, xeyriyyəçilik və humanitar təşəbbüslərin irəli sürülməsi kimi çoxşaxəli fəaliyyət dairəsi Azərbaycan xanımının tükənməz gücünü nümayiş etdirir. Onun bütün təşəbbüslərinin, gerçəkləşdirdiyi layihələrin mərkəzində insan amili dayanır. Vətəndaşlarımız bu gün Mehriban Əliyevanın simasında köməyə ehtiyacı olanlara yardım əlini uzatmağa hazır etibarlı dayaq, doğma insan görürlər. Bu, onu göstərir ki, xeyirxahlıq və şəfqət insanın daxilindən gəlməlidir. Mehriban Əliyevanın humanizm, mərhəmət və nəciblik kimi ali mənəvi keyfiyyətlərdən irəli gələn əzmkar və geniş fəaliyyətinin təməlində məhz xalqa layiqli xidmət məramı dayanır”.
S.Əliyeva xatırladıb ki, Mehriban Əliyevanın deputatlıq dönəmində parlamentdə bir neçə amnistiya aktı qəbul edilib:
“Milli Məclisdəki fəaliyyəti dövründə Mehriban xanım humanizm prinsiplərinə sadiqliyini dəfələrlə sübut edib. Belə ki, onun təşəbbüsü ilə hazırlanmış amnistiya aktları 2007, 2009, 2013 və 2016-cı illərdə Milli Məclis tərəfindən qəbul olunub. Bunun nəticəsində də 10 minlərlə məhkum müxtəlif növ cəzalardan azad edilib”.
S. Əliyeva qeyd edib ki, bu gün Azərbaycan xalqı Mehriban Əliyevanın fəaliyyətinə layiqli qiymət verərək, onun bütün təşəbbüslərini dəstəkləyir və Azərbaycan xanımına ən yüksək hörmət və ehtiramını ifadə edir.
“Mən sonsuz xalq sevgisinə sahib olan Mehriban Əliyevaya uzun ömür can sağlığı və fəaliyyətində uğurlar arzulayıram”.
Milli Məclisin Ailə, qadın və uşaq məsələləri komitəsinin üzvü Dilarə Cəbrayılova bildirib ki, Azərbaycanın I vitse-prezidenti Mehriban Əliyeva alicənablıq, insanpərvərlik, kübarlıq kimi yüksək insani dəyərlərə malik olan şəxsiyyətdir:
“Bu gün Mehriban xanımın rəhbərliyi altında həyata keçirilən təhsil, səhiyyə, mədəniyyət, eləcə də sosial, idman və digər sahələrində çox böyük inkişaf özünü göstərir. Xatırlayırsınızsa, Mehriban xanım birinci vitse-prezident təyin olunduqdan sonra ilk iclasını qaçqınların və məcburi köçkünlərin sosial problemlərinin həllinə həsr etmişdi. Onun fəaliyyəti təkcə uşaq evlərinin tikilməsi və qurulması, məktəblərin inşası, yetim uşaqların mənzillə təmin olunması və digər bu istiqamətdə ardıcıl və sistemli işlərin aparılmasından ibarət deyil. Mehriban xanım həm də Azərbaycanın xarici ölkələrlə əlaqələrinin gücləndirilməsində böyük səylər göstərir. Azərbaycan həqiqətlərinin dünyaya çatdırılmasına, ölkəmizin beynəlxalq nüfuzunun artırılmasına yönəlmiş tədbirlərin həyata keçirilməsi onun fəaliyyət dairəsinə daxil olan prioritet sahələrdir. O, çox yüksək səviyyədə və ardıcıl işlər aparır”.
Deputat bildirib ki, birinci vitse-prezidentin müstəqil dövlətimizin möhkəmlənməsi yolunda fəaliyyəti öz bəhrəsini verməkdədir:
"Vaxtilə Azərbaycana məkrli münasibət bəsləyən ölkələr indi tamamilə fərqli yanaşma nümayiş etdirirlər. Heydər Əliyev Fondunun prezidenti Mehriban Əliyevanın, eləcə də fondun vitse-prezidenti Leyla Əliyevanın Azərbaycanın ən ağrılı problemi olan Qarabağ münaqişəsi ilə bağlı həqiqətlərin, azərbaycanlılara qarşı törədilən soyqırımlarının dünyaya çatdırılmasında, təbliğ olunmasında rolu böyükdür. Həmçinin “Xocalıya ədalət” kampaniyası çərçivəsində Azərbaycan həqiqətlərinin dünya dövlətləri tərəfindən tanınması istiqamətində aparılan işlər xüsusi əhəmiyyət daşıyır. Hesab edirəm ki, bu çox vacib məsələdir".
Deputat Azərbaycanın birinci vitse-prezidentinin eyni zamanda gözəl ailə başçısı olduğunu da xatırladıb:
“O həm də gözəl ana və nənədir. Bu da Azərbaycan qadınının bir nümunəsidir. Onun birinci vitse-prezident seçilməsi bir daha Azərbaycan qadınının nüfuzunun, yerinin nə qədər yüksək olduğuna bariz nümunədir. Mehriban xanım mərhəmət, xeyirxahlıq nümunəsi, məsuliyyətli, əsl Azərbaycan qadınıdır. Mən Mehriban xanıma uzun ömür can sağlığı və şərəfli missiyanın yerinə yetirməsində böyük uğurlar arzulayıram”.
