Fransanın Havr şəhərində silahlı şəxs bankda insanları girov götürüb.
Modern.az xarici mediaya istinadən xəbər verir ki, iki nəfər binanı tərk edə bilib.
Həmin şəxslərin verdiyi məlumata görə, hazırda içəridə dörd girov var. Bildirilir ki, silahlı kişi Havrın mərkəzində, Strasbur bulvarındakı bank filialına daxil olub və tələb irəli sürüb. Tələbin təfərrüatları hələlik açıqlanmır.
Bank binası mühasirəyə alınıb, hadisə yerinə terrorçuluqla mübarizə üzrə xüsusi təyinatlı polis bölmələri gəlib. Hazırda polis həmin şəxslə danışıqlar aparır.
“BFMTV” telekanalının məlumatına görə, şübhəli şəxs psixi problemləri olan və bir sıra qanun pozuntularına görə polis tərəfindən tanınan 34 yaşlı yerli sakindir.
