ABŞ-da noyabrda keçiriləcək prezident seçkiləri dünyanın diqqətlə izlədiyi marafona çevrilib. Demokrat Obama, yoxsa respublikaçı Romni?
Azərbaycanda da seçkidə kimin qalib gələcəyi müzakirə mövzusudur. Ölkənin bir sıra siyasi partiyalarının nümayəndələri Modern.az-a ABŞ-dakı seçki kampaniyası ilə bağlı fikirlərini bildirib.
Azərbaycan Xalq Cəbhəsi Partiyası (AXCP) Ali Məclisinin sədri Həsən Kərimov bildirib ki, hazırda Amerikada aparılan teledebatlar və sosioloji sorğuların nəticələri göstərir ki, Barak Obama respublikaçılar partiyasının nümayəndəsindən 10 % irəlidədir:
“Qarşıda hələ xeyli debatlar və görüşlər gözlənilir. Bu gün Amerikada aparılan siyasət və Amerika seçicilərinin də Obamaya münasibəti göstərir ki, bu seçkilərdə də Obama qalib gələcək. Amerikada həmişə demokratik seçki keçirilib. Azərbaycandan fərqli olaraq, orada saxtakarlıqdan söhbət gedə bilməz. Amerika həmişə demokratiyaya sadiq bir ölkədir və demokratiyaya sayğı var. Əminəm ki, Amerikada bu dəfə də seçkilər demokratik keçiriləcək.”
Azerbaycan Demokrat Partiyasının sədri (ADP) Sərdar Cəlaloğlu da həmkarı ilə eyni fikirdədir və deyib ki, bu seçkilərdə Barak Obamanın qalib gəlməsi mütləqdir:
“Barak Obama vaxtında Amerikanın beynəlxalq nüfuzunu xeyli gücləndirib. Dünya siyasətində çox güclü addımlar atıb. Xüsusilə Yaxın Şərq inqilabında düzgün siyasi mövqe tutub. Eyni zamanda, Amerikanın daxilində də sosial-iqtisadi sahədə ciddi böhranlar yaşanmayıb. Amerika xalqı çox güman ki, bu dəfə də Obamanı seçəcək. Amerikada bizdən fərqli olaraq, iki mərhələli seçkidir. Bu iki pilləli seçki də ədalət çox təmin olunduğundan, seçki demokratik keçirilir. Barak Obama 100 faiz qalib gələcək. Həm də Obamanın builki rəqibi həddindən artıq zəif adamdır”-deyə S.Cəlaloğlu bildirib.
Yeni Azərbaycan partiyasının (YAP) icraçı katibinin müavini, deputat Mübariz Qurbanlı deyib ki, indidən kimin qalib gəlməsi barəsində proqnoz vermək asan deyil:
“ABŞ-dakı seçkilər bu gün bütün dünyada diqqətlə izlənilir. Hazırda qüvvələr nisbəti faktiki olaraq, hər iki partiyada eyni görünməkdədir. Amma azacıq cənab Obamanın üstünlüyü müşahidə olunmaqdadır. Bütövlükdə, Amerikada seçkilərin nəticələri, prezident seçkiləri Amerika siyasətinə, onun xarici siyasətinə o qədər də ciddi təsir göstərmir. Hesab edirəm ki, ABŞ-dakı hansı partiyanın seçilməsindən asılı olmayaraq, Azərbaycan -ABŞ münasibətləri strateji tərəfdaşlıq səviyyəsində davam edəcək. Analitik təhlilərdən Obamanın üstünlüyü görünür. Azərbaycan üçün hansı namizədin qələbə çalmağından asılı olmayaraq, bizim münasibətlərimiz dəyişməz qalacaq. Amma kimin qalib gələcəyi haqqında proqnoz vermək o qədər də asan deyil, çünki hazırda qüvvələr nisbəti faktiki eyni görünməkdədir “-deyə M.Qurbanlı deyib.
Nihadə Eyyubova
