Ermənistan Respublikasının xarici işlər naziri Ararat Mirzoyan fevralın 8-də Haaqada Niderland Krallığının xarici işlər naziri Hank Brauns Slott ilə görüşüb.
Modern.az xəbər verir ki, görüşdə Ermənistan-Hollandiya ikitərəfli gündəliyi və siyasi dialoqun genişləndirilməsi perspektivləri ətrafında fikir mübadiləsi aparılıb.
Ermənistan və Hollandiya xarici işlər nazirləri Ermənistan-Avropa İttifaqı tərəfdaşlığı ilə bağlı məsələləri müzakirə ediblər.
Görüşdə Cənubi Qafqazda baş verən son hadisələr və ümumi təhlükəsizlik vəziyyətinə toxunulub.
Nazir Mirzoyan həmkarına Ermənistanın regionda sabitlik və sülhün bərqərar olması ilə bağlı baxışını təqdim edib. Sülh müqaviləsi layihəsinin hazırlanmasındakı irəliləyişlərə gəlincə, nazir Mirzoyan vurğulayıb ki, təkcə Ermənistanın deyil, Azərbaycanın da əsas məsələlərdə aydın öhdəliyə ehtiyacı var. Erməni nazir Ermənistan-Azərbaycan münasibətlərinin tənzimlənməsi prosesində Ermənistan tərəfi üçün fundamental prinsipləri, xüsusən də ərazi bütövlüyü və sərhədlərin bölünməzliyinə birmənalı hörmətin vacibliyini vurğulayıb.
Bölgədə nəqliyyat və iqtisadi marşrutların açılması və Ermənistan Respublikasının sülh gündəliyi kontekstində nazir Mirzoyan həmkarının diqqətini öz hökuməti tərəfindən hazırlanmış “Sülh kəsişməsi” layihəsinin əsasını təşkil edən prinsiplərə yönəldib.
Ermənistan və Niderlandın xarici işlər nazirləri fəal təmasları və müzakirələri davam etdirmək barədə razılığa gəliblər.
