“İlhamə Quliyevanın nəşinin Pataloji Anatomiya Burosuna ekspertizaya gətirilməsinə səbəb onun keçmiş köməkçisi Mehriban Hüseynova tərəfindən zəhərlənməsi ilə bağlı verdiyi açıqlama olub”.
Modern.az "report"a istinadən xəbər verir ki, bunu jurnalistlərə İ.Quliyevanın qohumu, müğənni Əli Mirəliyev deyib.
O bildirib ki, ekspertiza İ.Quliyevanın ürək çatışmazlığından, yaxud zəhərlənmədən öldüyünə aydınlıq gətirəcək.
“Qafqazinfo”nun məlumatına görə, müğənninin yaxınları, sənət dostları onun ölümü ilə bağlı sui-qəsd versiyasını da irəli sürülüblər.
Belə ki, teleaparıcı və xalq artistinin yaxın dostu Elgiz Əkbər İlhamə Quliyevanın öz əcəli ilə ölməsinə şübhə etdiyini bildirib:
“İlhamə Quliyeva ölməyib, öldürülüb”.
Bununla bağlı daha bir iddianı isə primadonnanın rəfiqəsi, Lider TV-nin aparıcısı Lamiyə Ələkbərova səsləndirib:
“Dünən iki saat mənimlə dərdləşdi. Onda həyatsevər əhval-ruhiyyə var idi. Gecə 23:20-də mənə zəng vurub dedi ki, 8 Mart günü efirində qonaq olmaq istəyirəm. Studiyanı gül-çiçəklə bəzəyin. Köməkçisi dedi ki, halı anidən pisləşdi. Həkim gələnə kimi dərman verib, bu vaxtı özündən gedib. İlhamə xanımın öldürülməsi barədə dəqiq məlumat deyə bilmərəm”.
Müğənni Ə.Mirəliyev isə Moderator.az-a açıqlamasında Quliyevanın vəsiyyətindən də danışıb.
“İlhamə Quliyeva müsəlman qaydalarına uyğun olaraq dəfn ediləcək. Biz xristian deyilik ki, İlhamə xanımı dediyi kimi dəfn edək. Ola bilər ki, tabutda dəfn edək, ancaq mütləq müsəlman qaydalarına uyğun olaraq kəfənlənəcək. Bu vəziyyətdə deyə bilmərəm ki, onun vəsiyyətini həyata keçirəcəyik, ya yox. Nə deyibsə hər halda onu yerinə yetirməyə çalışacağıq”.
Modern.az
