Türkiyə polisi İstanbulda partlayış törətməkdə şübhəli bilinən kamikadze-terrorçunun İŞİD terror qruplaşmasının üzvü olduğu ehtimal edilir. Modern.az saytı xəbər verir ki, bu barədə “Doğan” xəbər agentliyinə polisdəki mənbə bildirib.
Məlumata görə, 33 yaşlı Savaş Y. bundan əvvəl 2015-ci ilin mayında Xalqların Demokratiya Partiyasının (HDP) Mersin və Adanadakı ofislərinə terror hücumları törətməkdə şübhəli bilinib. Partlayışlar nəticəsində 3 nəfər yaralanıb, terror aktlarının təşkilatçısı Savaş Y. isə Suriyaya qaçıb. Onun adı, barələrində axtarış elan edilən potensial terroçu-kamikadzelərin siyahısına daxil edilmişdir. Onun atasından götürülən qan nümunəsi DNT analizinin aparılması üçün Adanadan İstanbula gətirilib.
Qeyd edək ki, İstanbulda baş verən partlayış nəticəsində 5 nəfər ölüb, 36 nəfər yaralanıb.
Modern.az
