"İqtisadiyyatın inhisardan çıxarılması bizim milli prioritetimizdir. Aparıcı beynəlxalq maliyyə agentlikləri Qazaxıstanın iqtisadi artımı stimullaşdırmaq səylərini müsbət qiymətləndirib. Biz açıq iqtisadiyyata malik olmaqla, dünyanın 180 ölkəsi ilə ticarət əlaqələrini davam etdiririk. Dünyada baş verən iqtisadi böhrana baxmayaraq, qeyri-əmtəə məhsullarının ixracı 40 faizə yaxın artıb. Biz investisiyaların cəlb edilməsində Mərkəzi Asiyada lider mövqeyimizi daha da gücləndirmək niyyətindəyik".
Modern.az xəbər verir ki, bunu Qazaxıstan prezidenti Kasım-Jomart Tokayev xarici ölkələrin səfirlərilə görüşündə bildirib.
Dövlət başçısı çıxışında Qazaxıstanın regional və qlobal ərzaq təhlükəsizliyinin təmin edilməsinə verdiyi töhfədən danışıb.
"Biz hər il 5 milyon tondan çox buğda və 1,5 milyon tondan çox un tədarük etməklə 10 ən böyük taxıl məhsulu ixracatçısı arasındayıq”.
Tokayev Qazaxıstan iqtisadiyyatında nəqliyyat və logistika sənayesinin xüsusi rolunu qeyd edib: "Hazırda Çin-Avropa dəhlizi üzrə quru tranzit daşımalarının 80 faizdən çoxu ölkəmizin ərazisindən keçir”.
Prezident deyib ki, Qazaxıstanın ardıcıl demokratikləşməyə və hərtərəfli sosial-siyasi transformasiyalara doğru kursu dönməz xarakter daşıyır.
"Yeni model hakimiyyətin müntəzəm rotasiyasını təmin edəcək və müasir Qazaxıstan dövlətçiliyinin daha da demokratik inkişafını möhkəmləndirəcək. Bir neçə həftədən sonra keçiriləcək növbədənkənar prezident seçkiləri bu dəyişiklikləri nəzərə alacaq. Bu seçkilər Qazaxıstanda yeni siyasi ənənə yaradacaq. Mən və administrasiyam açıq və ədalətli prezident seçkilərinin keçirilməsi üçün hər cür şəraiti təmin etmək əzmindəyik”, - deyə o vurğulayıb.
