ABŞ-ın keçmiş prezidentləri Bill Klinton, Corc Buş və Barak Obama vəzifədən getdikdən sonra bütün məxfi sənədləri Milli Arxivə təhvil veriblər.
Modern.az xəbər verir ki, bu barədə CNN siyasətçilərə istinadən bildirib.
"Klintonun bütün məxfi materialları lazımi qaydada Milli Arxivə təhvil verilib", - Klintonun ofisindən bildirilib.
Kiçik Buş və Obamanın nümayəndələri də keçmiş prezidentlərin eyni yolla getdiyini bildiriblər.
Bundan əvvəl ABŞ-ın keçmiş vitse-prezidenti Mayk Pensin şəxsi evində dövlətin məxfi sənədlərinin tapıldığı bildirilmişdi. O, 2017-2021-ci illərdə Donald Trampın prezidentliyi dövründə ABŞ hökumət iyerarxiyasında ikinci məmur vəzifəsində çalışıb.
ABŞ-da dövlətin ən yüksək vəzifəli şəxslərinin məxfi sənədlərlə işləmə qaydalarına əməl etməməsi ilə bağlı xəbərlərdən sonra qalmaqal geniş vüsət alıb. 2022-ci ilin avqustunda Donald Trampın Floridadakı malikanəsində belə materialların böyük kolleksiyası aşkar edilmişdi. Sonra oxşar tapıntılar hazırkı prezident Co Baydenin şəxsi kabinetində və şəxsi evinin qarajında tapılıb.
