Ukrayna Prezident Ofisi rəhbərinin müşaviri Mixail Podolyak növbəti dəfə rəsmi Kiyevin Rusiya Federasiyası ərazisində baş verən insidentlərdə - Bryansk vilayətindəki hadisələrdə və PUA hücumlarında iştirakını təkzib edib.
Modern.az xəbər verir ki, o, tviter səhifəsində bu barədə yazıb.
"Kritik obyektlərdə partlayışlar, naməlum PUA-ların Rusiya Federasiyasının regionlarına hücumları, toqquşmalar, yaşayış məntəqələrinə partizanların hücumları - bütün bunlar Rusiya Federasiyası daxilində nəzarətin itirilməsinin birbaşa nəticələridir. Müharibənin nəticələri isə... Ukrayna Rusiya Federasiyasındakı daxili münaqişələrdə iştirak etmir...”, - deyə müşavir vurğulayıb.
Qeyd edək ki, dünən Podolyak Bryansk hadisələri barədə açıqlamasında Rusiya Federasiyasının ya partizan müharibəsi ilə üzləşdiyini, ya da bunun qəsdən törədilmiş təxribat olduğunu bildirmişdi.
