Tovuzda gəlin və qayınanası naməlum cismin partlaması nəticəsində xəsarət alıb.
Modern.az xəbər verir ki, hadisə rayonun Əlibəyli kəndində qeydə alınıb.
Kənd sakinləri, 1961-ci il təvəllüdlü Tağıyeva Roza Abbas qızı və onun gəlini, 1992-ci il təvəllüdlü Esmira Xəqani qızı Tağıyeva yaşadıqları evin həyətində çörək bişirən zaman ocağa odun qoyduqdan bir müddət sonra partlayış baş verib. Hadisə nəticəsində R.Tağıyeva qarın nahiyəsindən, onun gəlini isə əl və üz nahiyəsindən xəsarət alıb.
Hər ikisi xəstəxanaya yerləşdirilib, onlardan R.Tağıyeva cərrahiyyə əməliyyatı olub, vəziyyəti orta-ağır qiymətləndirilir.
Yaxınlarının dediyinə görə, hadisəyə odunun içərisində olan naməlum hərbi sursatın partlaması səbəb olub. Belə ki, Ermənistanla sərhəddə yerləşən kənd ərazisi daha əvvəl tez-tez atəşə tutulub. Güman edilir ki, həmin dövrdə atılan hansısa hərbi sursat odunun içərisində qalıb.
Faktla bağlı araşdırma aparılır.
