Sumqaytıda yerləşən uşaq bağmasında yanğın baş verib.
Modern.az-ın məlumatına görə, hadisə Sumqayıt şəhərində yerləşən 25 saylı körpələr-evi uşaq bağçasında qeydə alınıb.
Bağçadakı müəllim və uşaqlar təxliyə edilib.
Məsələ ilə bağlı Abşeron-Xızı Regional Təhsil İdarəsi ilə əlaqə saxladıq.
Qurumdan bildirilib ki, yanğın bağçanın təmir gedən korpusunun çöl elektrik xəttində qısaqapanma nəticəsində baş verib.
Bildirilib ki, məktəbəqədər təhsil müəssisəsinin həmin korpusunda təmir həyata keçirildiyindən boş olub.
"Əvvəlcədən yanğın təhlükəsizliyi ilə bağlı görülmüş tədbirlər sayəsində hadisənin yayılmasının qarşısı alınıb, digər korpusda olan uşaqlar və tərbiyəçi-müəllimlər təxliyə planına uyğun olaraq təhlükəsiz yerə təxliyə ediliblər, onların səhhətində heç bir problem yaranmayıb. Yanğın zamanı yalnız elektrik xətti zərər görüb.
Hazırda aidiyyəti qurum tərəfindən hadisənin başvermə səbəbləri araşdırılır, bağçanın elektrik sisteminin ən qısa zamanda bərpası çərçivəsində işlər aparılır. Bildiririk ki, məktəbəqədər təhsil müəssisəsinin digər korpusunda təlim-tədris prosesi fasiləsiz şəkildə davam edir", - rəsmi açıqlamada qeyd olunur.
