Salyanda qonşusunu bıçaqlayan şəxsə hökm oxunub.

Modern.az-ın məlumatına görə, hadisə ötən ilin oktyabr ayında baş verib.

Salyan sakini Mədət həyat yoldaşının qonşusu Azərlə münasibəti olmasından şübhələnib. O, Azərin işlədiyi avtomobil təmiri sexinə gedib. Mədət cibində gəzdirdiyi mətbəx bıçağı ilə Azərin qarın nahiyəsinə zərbə endirib. O, xəstəxanaya çatdırılıb və sağ qalıb.

Məhkəmədə ifadə verən Mədət bildirib ki, arvadının xəyanət etdiyini düşündüyü üçün onu əvvəlcə “tənbeh edib”, sonra isə Azərlə söhbətə gedib. O deyir ki, Azəri öldürmək fikri olmayıb, sadəcə “söhbət etmək” istəyib. Lakin söhbət sonda bıçaq zərbəsi ilə bitib.

Azər isə ifadəsində bildirib ki, Mədətin arvadı ilə heç bir münasibəti olmayıb, onun evinə yalnız toyuq-cücənin keçməsi ilə bağlı irad bildirmək üçün girib-çıxıb. Hadisə baş verəndə Mədət ondan pul istəyib, sonra da bıçaqla vuraraq qaçıb.

Mədət özü polisə gedərək könüllü təslim olub. O, əvvəllər psixoloji müalicə alıb, hərbi xidmətə də bu səbəbdən getməyib. Məhkəmədə günahını qismən etiraf edən Mədət deyib ki, zərərçəkmişə dəyən ziyanı ödəməyə hazırdır və yüngül cəza istəyir.

Məhkəmə onun Cinayət Məcəlləsinin 126.1-ci maddəsi ilə təqsirli olduğuna qərar verib və 4 il müddətə azadlıqdan məhrumetmə ilə cəzalandırıb.