Azərbaycanın Futbol üzrə Milli Komandası son qarşılaşmalarda ard-arda məğlubiyyətlərlə üzləşib. Milli komandamız Haiti ilə qarşılaşmada "3:0", Belarusla qarşılaşmasında isə "2:0" hesabı ilə məğlub olub. Bu isə azərbaycanlı azerşkeşləri, futbol həvəskarlarını məyus edib.
Millinin baş məşqçisi Fernando Santuş isə qalib gəlmək üçün komandanın əllərindən gələni etdiyini bildirib.
"Dəfələrlə demişəm. Bəlkə də hamıdan çox üzgünəm. Karyeram boyu bu qədər uduzmamışdım. Öz işimə inanıram, oyunçuların potensialına da inanıram. İstədiyimiz nəticələri əldə edə bilərik", - o, son oyundan sonra bildirib.
Qeyd edək ki, Santuş baş məşqçi təyin edildən sonra Azərbaycan millisi 8 oyun keçirib, onların 7-sində məğlub olub, biri isə qolsuz başa çatıb.
Modern.az-a açıqlamasında Milli Məclisin deputatı Razi Nurullayev Azərbaycan futbolunun hazırkı durumunu kriptovalyutalara bənzədib:
"Futbolumuz hazırda bir neçə günlük və ya aylıq yaradılan, qiyməti tez qalxan, yenidən sıfıra düşən birjalarda oynanılan kriptovalyutalara bənzəyir. Biz neçə illərdir düşünürük ki, Azərbyacan futbolu irəli gedəcək. Azərbyacan futbolu isə gah irəli gedir, sonradan yenidən geriləyib sanki quyunun dibinə düşür. Mənə belə gəlir ki, biz kifayət qədər tez-tez Azərbaycana xarici mütəxəssislər cəlb edirik, amma hələ bu günə qədər xarici mütəxəssislərdən Azərbaycan futboluna nəsə yaxşı töhfə yadıma gəlmir. Hazırki məşqçi qələbə ilə yadda qalmayıb. Bildiyim qədəri ilə 7-8 oyundur ki, komanda ard-arda məğlub olur. Bu bir göstərici deyilmi? Çox ciddi göstəricidir. Mənə elə gəlir ki, artıq Azərbaycan azerkeşləri futbola baxıb əsəb xəstəliyi keçirmək istəmirlər, hər kəsin psixologiyası pozulur, futbola olan inamı azalır. Bu baxımdan Azərbaycan futbolunu mən hazırda dərin böhranda görürəm. Amma baş məşqçi belə düşünmür. Ancaq bu,necə ola bilər? Fakt göz qarşısındadır, bir dəfə də uğur qazanmayıb. Belə bir futbol olarmı? Ona görə də yenə ümidimizi bağlayaq yerli futbolçularımıza, qoy, uşaq futbolu yaxşı yaransın. Bu istiqamətdə müəyyən addımlar atılır. Ancaq illərdir eşidirik ki, uşaq komandaları ilə bağlı müxtəlif dünya komandalarının klubları fəaliyyət göstərib, bağlanıb. Amma davamlı fəaliyyət göstərən, qalan olmur. Sanki hamısı hansısa müddətli layihəyə hesablanıb. Bu istiqamətdə işlər görülsə də, bu işə pul yatıran iş adamları nəsə düzgün strategiya seçə bilmirlərmi? Burada günahı AFFA-da da görə bilmərik. AFFA futbol oynamır, futbolçular oynayırlar, qurum əlindən gələni edir. Lakin istənilən halda futbolumuz ağır vəziyyətdədir”.
Deputat artıq futbola baxmaq istəmədiyini deyib: “Artıq mən futbola baxmaq istəmirəm. Çünki mənə pis təsir edir. Futbola baxandan sonra iki gün beynimdə o fikirlər qalır, əhval-ruhiyyəm pozulur, ürək bulanması gəlir, özümü pis hiss edirəm, başım ağrıyır. Mənə elə gəlir ki, Azərbaycan futbolunun yaxşı olması, həm də xalqımızın əhval-ruhiyyəsinin qalxmasına səbəb olardı, onların depressiyadan qurtarmasına səbəb olardı”.
