Müasir dünyada ətrafımızda baş verənlərə nəzər yetirdikdə hər yerdə siyasi çalarları görmək mümkündür. İdmandan incəsənətə, dindən mədəniyyətə - bütün sahələrdə...
Uzun illərdir ki, Azərbaycan idmançılarının uğur qazanmasına hər cür əngəllərin törədilməsi bunun ən adi nümunələrindən biridir.
Ancaq məsələ göründüyü qədər sadə deyil...
Xarici səbəblərlə birgə daxildə də idmandakı uğurlarımızı həzm etməyənlər, bunun qarşısında bilərəkdən və ya bilməyərəkdən maneə yaradan qüvvələr var...
Öz işini düzgün şəkildə icra etməyən bir qrup səlahiyyət sahiblərinin uğursuz fəaliyyətinə görə idmansevər insanımızın şüurunda süni şəkildə belə bir fikir formalaşdırılıb: "Əşi, bizdə idman var?!", " Azərbaycanda nə vaxt futbol olub ki?!" və sair...
Dünənki mini futbol üzrə dünya çempionatının finalında Azərbaycan millisinin qazandığı möhtəşəm qələbə xarici təsirlərə verilən öldürücü cavab olmaqla bərabər daxilimizdəki bir kəsim yarıtmaz "idman biliciləri"nin (biclərinin də demək mümkündür) başlarına dəyən möhkəm zərbə təsiri bağışladı...
Qəhrəman Azərbaycan əsgəri 44 gündə və 24 saat ərzində "məğlubedilməz ordu" mifini necə darmadağın etmişdisə, dünən axşamkı qələbə də həmin ruhun davamı idi...
Bir neçə gün davam edən dünya çempionatının həlledici qarşılaşmalarında da oyunçularımızdan sıravi azarkeşinə, qapıçımızdan hücumçumuzadək hər kəs döyüşdü... Dəmir yumruq kimi bir olduq, güc olduq! Bu da nəticəsi...
Azərbaycan millisi mini futbol üzrə dünya çempionudur...
Bu arada, 44 günlük savaşımızı kiçiltmək və fərqli cür yozmağa çalışanların davamçıları da iş başındadır...
El təbrincə desək, sapı özümüzdən olan baltaları da görməzdən gəlmək doğru deyil...
Bir-iki cümlə onlar barədə də danışmağa ehtiyac var...
Guya meydança balacaydı, oyunçuların sayı az idi - Bu tip cümlələr işlədərək, qalibiyyətimizi kiçiltməyə çalışanlar da tapılır...
Hansı ki, 44 günlük müharibədə də hər şey ancaq PUA-nın hesabına oldu, "Bunlar Rusiyanın planı idi" kimi sərsəmləyənlərin ardıcılları da hələ susmaq istəmir...
Görününən odur ki, bizim qələbələrimiz hələ çoxlarının gözlərinə ox kimi girəcək! Belə olduqca "dəmir yumruq" hələ çox başlar əzəcək...
Heydər İsmayıl
Mediatürk TV-nin aparıcısı
