Son aylarda Bakının kirayə mənzil bazarında ciddi bahalaşma müşahidə edilir. Əmlak bazarı üzrə ekspertlərin sözlərinə görə, qiymət artımının əsas səbəblərindən biri tələb-təklif nisbətindəki dəyişikliklər və paytaxtda kirayə mənzillərə olan yüksək tələbatdır. Xüsusilə şəhərin mərkəzi rayonlarında kirayə haqları əhəmiyyətli dərəcədə yüksəlib.

Əvvəllər 500-600 manata təklif edilən mənzillər indi 700-800 manat civarında dəyişir. Ekspertlər bildirirlər ki, Bakıda yeni tikililərin sayı artsa da, kirayə mənzil bazarında təklifin tələbi ödəməsi üçün kifayət etmir. Digər tərəfdən, bəzi mənzil sahiblərinin qiymətləri süni şəkildə artırdığı da qeyd olunur.

Kirayə bazarındakı bu bahalaşmanın yaxın aylarda da davam edəcəyi proqnozlaşdırılır.

Əmlak məsələləri üzrə ekspert Ramin Osmanlı Modern.az-a bildirib ki, qiymət artımı paytaxtın bütün ərazilərində müşahidə olunur:

"Sadəcə yerləşmədən asılı olaraq, mərkəzdə və mərkəzə yaxın olan ərazilərdə qiymət artımı daha az, mərkəzdən kənar yerlərdə isə daha çox qeydə alınıb. Amma bütünlüklə bütün şəhər ərazisində qiymət artımı müşahidə olunmaqdadır. Ötən il ərzində Bakı şəhəri üzrə kirayə mənzil bazarında orta qiymət artımı 20%-dən artıq olub. Bu proses əvvəlki dövrdə yalnız mövsüm aylarında, tələbə axını baş verərkən nəzərə alınırdısa, indi bütün il boyu özünü büruzə verir".

Ekspert qeyd edib ki, qiymət artımının səbəbləri müxtəlifdir: "Sözsüz ki, söküntü işləri və şəhərsalma ilə bağlı müəyyən işlər var. Bu da kirayə mənzili bazarında bütün il ərzində qiymət artımını şərtləndirir".

Zərif Sofiyeva