Mərhum Xalq yazıçısı Mövlud Süleymanlıya verilən "Heydər Əliyevin 100 illiyi (1923–2023)" yubiley medalı onun ailəsinə təqdim edilib.
Modern.az saytının məlumatına görə, mədəniyyət nazirinin müavini Murad Hüseynov yubiley medalını Mövlud Süleymanlının oğlu Elay Balakişiyevə təqdim edib.
Təqdimat zamanı mərhum Xalq yazıçısının ədəbiyyat və kino sahəsindəki yaradıcılığından söhbət açılıb.
Mərhumun gəlini Təranə Balakişiyeva isə sosial şəbəkədə “Allah rəhmət eləsin dahi insan, kaş bu medalını da görəydin” deyə atası haqda paylaşımında qeyd edib.
Mövlud Süleymanlıya qəbirüstü abidə də ucaldılıb. Abidə başdaşı və büstdən ibarətdir. Qəbirüstü abidə üzərində işlərin yaxın günlərdə tamamilə yekunlaşacağı gözlənilir.
Xalq yazıçısı Mövlud Süleymanlı öz vəsiyyətinə uyğun olaraq Şamaxının Kərkənc kənd qəbiristanlığında anası və qardaşının yanında torpağa tapşırılıb.
Əməkdar incəsənət хadimi, Xalq yazıçısı 21 fevral 2024-cü il tarixində, ömrünün 81-ci ilində vəfat edib.
O, 1968-ci ildə Аzərbаycаn Radiosundа əmək fəaliyyətinə başlayıb. 1992–2009-cu illərdə Аzərbаycаn Dövlət Telerаdiо Şirkətinin rаdiо üzrə sədr müаvini vəzifəsində işləyib. M.Süleymanlı həmçinin “Azərbaycanfilm”kinostudiyasında, "Ulduz" və “Azərbaycan” jurnаllarındа müxtəlif vəzifələrdə çalışıb.
Azərbaycan ədəbiyyatında daha çox nasir kimi şöhrət qazanan yazıçının “Qar”, “Yanğın”, “Şanapipik”, “Şeytan”, “Dəyirman” əsərlərindən ibarət “Ayın aydınlığında” (1979) kitabı çapdan çıxıb və ədəbi ictimaiyyətin diqqətini cəlb edib. 1980-ci illərin əvvəllərindən roman janrına müraciət edən yazıçının “Köç”, “Ceviz qurdu”, “Səs” əsərləri də şöhrət qazanıb.
M.Süleymanlının bir sıra əsərləri tamaşaya qoyulub (“Kökdən düşmüş piano”, “Dəyirman” və s.), onun ssenariləri əsasında filmlər (“Çətirimiz buludlardır”, “Bəyin oğurlanması” və s.) çəkilib.
Azərbaycan ədəbiyyatı və mədəniyyətinin inkişafında xidmətləri yüksək qiymətləndirilən yazıçı “Əməkdar incəsənət xadimi” və “Xalq yazıçısı” fəxri adlarına, “Şöhrət” və “Şərəf” ordenlərinə layiq görülüb. 2008-ci ildən Azərbaycan Respublikası Prezidentinin fərdi təqaüdçüsü idi.
Mərhumun nəvəsi Fidan babasının qəbirindən görüntüləri Modern.az-a təqdim edib
