Gənclər arasında ənənəvi evlilik qaydalarına marağın azaldığı müşahidə olunur. Qədim toy adət-ənənələrimizi 10-15 nəfərdən ibarət nikah mərasimləri əvəzləyir. Bu da cəmiyyətdə bir sıra müzakirələrə səbəb olub. Gənclər daha çox sadə, modern və dostlarla birlikdə olan yığıncaqlara üstünlük verirlər. Bu proses də milli-mənəvi dəyərlərimizə təsirsiz ötüşmür.
Sosioloq Elçin Bayramlı Modern.az-a deyib ki, son vaxtlar cəmiyyətdə neqativ tendensiyaların sayı artıb. Bəzən “müasirlik” adı altında qədim adət-ənənələrimiz, dəyərlərimiz adiləşir və unudulur:
“Təəssüf ki, milli adət-ənənələrimizi qeyri-mədəni dəyərlər əvəzləyir”.
Sosioloq deyib ki, bəzi gənclər bunun adını “avropalaşma”, “müasirləşmə” qoyur.
“Yaşlı nəsil öz adət-ənənələrini qorusa da, bunu yeni nəsilə tam ötürə bilmir. Yeni nəslin əksər nümayəndələri düşüncə və qərarlarında tamamilə milli dəyərlərdən uzaq hərəkət edirlər. Bəzən “müasirlik” adı altında bizə yad hadisələri müşahidə edirik. Nəticədə heç bir dəyəri olmayan “kütlə” yetişir”.
Sosioloqun fikrincə, bu proseslərdə ailə institutlarının rolu böyükdür.
“Düzgün maarifləndirmə aparılmadıqda böyüyən uşaq və yeniyetmələrin davranışları, düşüncələri mənfiyə doğru dəyişir. Avropa mədəniyyətindən yararlanmağın müsbət tərəfləri də var. Cəmiyyət daim inkişaf edib öyrənməlidir. Ancaq bunu öz dəyərlərini unudaraq deyil, yaşadaraq etsə, yaxşı olar”, - E.Bayramlı deyib.
Onun sözlərinə görə, yeni nəslin nümayəndələri ətraf cəmiyyətlərdən faydalı heç nəyi götürmür.
“Əgər yüz informasiya cəmiyyətə daxil olursa, onun biri, ya da ikisi faydalı ola bilər. Qalanları bizə zidd olanlardır. Amma günahı ancaq gənclərdə görmək düzgün deyil. Yaşlı nəsil özü də bu istiqamətdə addımlar ata bilər, lakin atmır”,- deyə o bildirib.
"İstər toy adətləri olsun, istərsə də digər dəyərlərimiz, vətəndaşlar bilməlidir ki, ənənələri qorumaq, milli kimliyi qorumaqdır. Bütün nəslin əyləndiyi və fərqli adətlərin icra olunduğu, nişan-toy məclisləri, öz bayramlarımız artıq sönük və maraqsız keçirilir. Sanki adətlərimizə qəribə ikrah hissi yaranıb. Cəmiyyət olaraq, bu prosesə biganə qalmaq düzgün deyil. Hər bir vətəndaş ilk olaraq, yazılmayan qanunlarımıza (adət-ənənələrimizə) dəyər verib onu qorumalıdır”-deyə sosioloq əlavə edib.
Zərif Sofiyeva
