Azərbaycan Mətbuat Şurasında istehsalat təcrübəsində olan Azərbaycan Dillər Universitetinin bir qrup tələbəsi “Modern Media Qrupunun” redaksiyasında olub. Tələbələr media qurumlarının gündəlik işi ilə yaxından tanış olub, jurnalistikanın müxtəlif sahələrinə dair praktiki biliklər əldə ediblər.
Tələbələr Modern.az xəbər saytı, Media Türk TV, AzEdu Təhsil Portalı və New Diaspora of Azerbaijan platformasının redaksiyalarında olub, həmin qurumların fəaliyyəti, xəbərlərin hazırlanması prosesi və media mühitində tətbiq olunan yeni texnologiyalar haqqında ətraflı məlumat alıblar.
Media qurumlarının baş redaktorları və jurnalistləri tələbələrin suallarını cavablandırıb, onlara yazılı və televiziya jurnalistikasının incəliklərindən danışıb, sahə üzrə peşəkar məsləhətlər veriblər. Müzakirələr zamanı jurnalist etikası, informasiyanın operativliyi və sosial medianın ənənəvi mediaya təsiri kimi mövzular ətrafında fikir mübadiləsi aparılıb.
Görüşün sonunda xatirə şəkli çəkilib və tələbələrə gələcək fəaliyyətlərində uğurlar arzulanıb.
