Milli Ordunun Beyləqanda yerləşən “N” saylı hərbi hissəsində silahlı insident baş verib. Müdafiə Nazirliyinin mətbuat xidmətinin rəis müavini, kapitan Teymur Abdullayevin ANS PRESS-ə verdiyi məlumata görə, hərbi hissənin əsgəri Arif Şakir oğlu Cəfərov təhlükəsizlik qaydalarını pozaraq tabeliyindəki silahdan atəş açıb. Hadisə nəticəsində onun əsgər yoldaşı Hikmət Eldar oğlu Yusifov güllə yarası alıb. Nəticədə o hadisə yerində həlak olub. Bundan sonra hadisəni törədən əsgər qaçıb gizlənib.
Qeyd edək ki, hazırda Arif Cəfərovun tapılması üçün tədbirlər görülür.
Hadisəni törədən 1993-cü il təvəllüdlü A.Cəfərov Gədəbəy rayon Hərbi Prokurorluğundan hərbi xidmətə çağırılıb.
Modern.az
