Bir şadlıq evinin adminstratoru ötən illər ərzində 100-dən artıq bəy-gəlini girov saxladıqlarını söyləyir
Azərbaycanda toy mədəniyyətinin ifrat mədəniyyətsizlik həddinə çatması nə ilə bağlıdır?
Bir günlük çal-çağır mərasiminin insanları illərlə altından çıxa bilməyəcəkləri borc bataqlığına saldığı halda, kimlərsə ciblərini doldurur...
Məhərrəmlik ayı başa catır. Yəqin hər kəs dost-tanışlarının içərisində tez-tez belə giley-güzar edənlərə rast gəlir: “Ehhh, yenə toylar başlayacaq”. Bəli, Azərbaycan vətəndaşı toya cağırılmasından narahat olur. Nədən?
Bu sualı cavablandırmazdan öncə, bir-neçə il əvvəl müğənni Nadir Qafarzadə ilə bağlı mətbuatda yayılan bir məlumatı xatırlatmaq istərdik. Müğənni bildirmişdi ki, şəhər restoranlarının birində keçirilən toy mərasimində əvvəldən axıradək oxuyub, məclisi idarə etsə də, toy sahibi onu pulsuz yola salıb. Müğənni bunu onunla izah etmişdi ki, mərasimə çox az adam gəldiyindən, toy ziyanla başa çatıb: “Üstəlik, toydan pulsuz gedən tək mən olmamışam. Toy sahibi hətta fotoqrafa da borclu qaldı”.
Müğənni toy sahibinin ona girov vermək istədiyini də demişdi: “O şəxs həyətimə xarici markalı maşın gətirdi ki, pulu verənə qədər həyətində qalsın. Mən insanlığımı göstərib, təklifi qəbul etmədim”.
Əslində, Nadir Qafarzadəyə borclu qalan toy sahibi hələ yaxşı qurtarıb. Belə görünür ki, o, heç olmasa restoranın pulunu ödəyə bilib. Əgər restorana da borclu qalsa, vəziyyət daha mürəkkəb olar, hətta restoran sahibi bəylə gəlini də girov götürərdi. Hər halda Azərbaycan reallığında belə faktlar da rast gəlinir və belə davam edərsə, daha da artacaq. Bir şadlıq evinin adminstratoru ötən illər ərzində 100-dən artıq bəy-gəlini girov saxladıqlarını söyləyib.
Toylar kütləvi və düşük mədəniyyətin intişar tapdığı bir yerə çevrilib
Bu faktlar bir çox hallarda əyləncəli xəbər kimi təqdim olunsa da, bizi böyük bir sosial bəlaya, cəmiyyətimizin, millətimizin, sözün həqiqi mənasında, yaralı yerinə çevrilən ciddi problemə diqqət ayırmağa məcbur etdi. Söhbət bizə sözün həqiqi mənasında “toy tutan” toylarımızdan gedir. Mətbuatda, hətta Milli Məclisdə (!) dəfələrlə günün toyları və onların səviyyələri haqqında yazılıb, danışılıb. Ancaq nə faydası, toylar düzəlmək əvəzinə daha da bayağılaşır, yersiz rəqabət, israfçılıq meydanına çevrilir.
Bəli, vaxtilə Azərbaycan mədəniyyətinin bir hissəsi hesab olunan toylarımızın hansı günə düşdüyünü açıq etiraf etməyin vaxtı çatıb. Bu gün toylarımız kütləvi və düşük mədəniyyətin intişar tapdığı bir yerə çevrilib. Məsələ təkcə şadlıq sarayında 5-6 saat cərəyan edən hoppanıb-düşmədə deyil axı! Buna qədər də bir sürü anlaşılmaz proses var, bundan sonra da.
Kimdən eşitdiyimi dəqiq xatırlamıram. Deyir əslində belə zıppıltıya ona görə toy deyirlər ki, toy sahibinin ürəyi partlamasın. Çoxları qonşudan dala qalmasın, "el tənəsi"nə, qohum qınağına tuş gəlməsin deyə, boğaza qədər borca girməli olur. Yəni bir gözü gülür, bir gözü ağlayır. Toyun mahiyyəti isə unudulur.
Toydan qabaq çalınan “toy”
İfrat həddə çatdırılan əsas məsələ də məhz toyun maliyyə tərəfi ilə bağlıdır və belə demək mümkünsə, bütün problemlər, narahatçılıqlar da buradan başlayır. Toy mərasiminin ayrı-ayrı mərhələlərində həm oğlan, həm də qız evinin üzərinə müəyyən xərc düşür. Daha çox xərc isə oğlan tərəfinin üzərinə düşür ki, bu da təbiidir. Çünki nişan aparılmasından başlamış bayramlarda gəlinə alınan hədiyyələr, gəlinlik paltarı və onun aksessuarlarının tikdirilməsi və ya kirayə götürülməsi, toy günü gəlinin və gəlin maşınının bəzədilməsi və gül dəstəsinin alınmasına qədər bütün xərcləri oğlan evi çəkir.
Araşdırmalar göstərir ki, indi gəlinlik paltarının kirayə haqqı 50 manatdan bir neçə min manata qədər yüksəlir. Gəlinin saçının yığılması, makiyajının qiyməti orta hesabla 50 manatdan 1000 manatadək xərc aparır. Gəlinin buketi isə 30-300 manat civarındadır. O ki qaldı gəlin maşınına, burada qiymət 50-500 manat arasında dəyişir. Bir sözlə, gəlinin bəzədilməsi, onun buketi, maşının tutulması, güllə bəzədilməsi və s. oğlan evinə orta hesabla bir neçə yüz manatdan bir neçə min manata qədər başa gəlir.
Toy günü bütün bəylər və gəlinlər gözəl görünmək istəyirlər, amma bunun üçün bahalı salonlara dünyanın xərcini tökmək lazım deyil. Sadə şəraitdə, yaxınlarının arasında bütün qayğıları rahatca həll etmək də olar. Bir neçə saat üçün ən dəbdəbəli gəlinlik paltarına və gül dəstəsinə pul ayırmaq israfcıldan başqa bir şey deyil. Əksinə, toy günü ifrat dərəcədə dəbdəbəli gəlinlik və ya bəylik dəsti geyməkdənsə, kosmetik vasitələrlə yaradılan süni gözəllikdənsə, olduğun kimi görünmək daha yaxşı təəssürat yaradar. Bu məsələnin bir tərəfi.
Cehiz vermək həyata sıfırdan başlayan ailəyə yardım məqsədi daşıyır. Bu səbəbdən də cehiz birdəfəlik yardım olaraq həm oğlan, həm də qız evinin borcu kimi qəbul edilirdi. İndi isə cehiz yardım deyil, özünügöstərmə, ucuz rəqabət, reklam vasitəsinə döndərilib. Cehiz verən ailə sanki qarşı tərəfə nəyə qadir olduğunu göstərmək istəyir.
Şadlıq evləri soyğunçuluqla məşğuldur
Ən ciddi problem isə son illər şadlıq evlərində qiymətlərin hədsiz artması, bunun nəticəsində həm toy yiyəsinin, həm də elə çağırılan qonaqların mədəni şəkildə soyulmasıdır. Elə bir vəziyyət yaranıb ki, insanlar artıq toya çağırılmağa az qala faciə kimi baxmağa başlayıblar. Diqqət edək: bu gün Bakıda ən ucuz restoranda bir yerin qiyməti 25 manatdan başlayır, 100-150 manatadək artır! İndi orta səviyyəli ailəni ayda heç olmasa bir toya dəvət etdikdə, aylıq maaşının az qala yarısını həmin toya salır. Vay o gündən ki, ay ərzində 2-3 toya dəvət etsinlər. Bu gün hətta yüksək gəlirli şəxslər şikayət edirlər ki, aldıqları maaş toylara çatmır. İndi təsəvvür eləyin ki, sadə vətəndaş, müəllim toya çağırılanda nə çəkir…
Qeyd etdik ki, şadlıq evlərində adambaşına 25-150 manat arası pul tələb olunur. Axı bir insan 5-6 saat ərzində qulaq batıran musiqinin altında nə yeyə bilər, hansı zövqü ala bilər ki, 100 manat bir yana, 30 manat tutsun. Bir stolda adətən 12 nəfər əyləşir. Yəni, ortabab toylarda bir stoldan şadlıq evinin sahibi təxminən 600-700 manat götürür. Nisbətən varlı adamların toyunda bu rəqəm 1200 manata qədər yüksəlir. Ancaq gəlin görək bu stolun üzərinə düzülənlərin qiyməti alınan pulun heç 20 faizi səviyyəsindədirmi? Adi hesablamalar göstərir ki, şadlıq evləri hər stoldan 4-5 dəfə artıq gəlir götürürlər. Hələ bir çox yeməklərin əvvəlki toylardan qalma, içkinin saxta olduğunu nəzərə alsaq, bu rəqəm daha da böyüyər. Bəs bununla bağlı niyə tədbir görən yoxdu? Bu sualın cavabını bir qədər sonraya saxlayaq.
Andreas Qross Azərbaycan toylarında nəyə heyrətlənib?
Azərbaycanda toy iki nəfərin ailə qurması mərasimindən daha çox iki nəfərin, üstəgəl onların ailələrinin borc bataqlığına salınması mərasiminə çevrilir. Toy - şənlik olmaqdan çıxıb, restoran, kafe estetikasına enir, salat, bahalı içki, kabab yarışmasına çevrilir. Heç bir musiqi və rəqs mədəniyyəti gözə dəymir. Hamı topa şəkıldə rəqsə qalxır, bir-birinin ayağını basa-basa, bir-birinə girə-girə (ifadəyə görə üzr istəyirik, ancaq buna başqa ad vermək olmaz) ortalıqda atılıb-düşür. Və biz bütün bu biabırçılıqlara, rəzilliyə, rüsvayçılığa “toy” demək zorundayıq. Hansı ki, kənardan baxanlar bizə nəinki rişxənd edir, bizdən sözün həqiqi mənasında iyrənirlər. Toy kimi gözəl bir adətimizi elə günə salmışıq ki, əcnəbilər baxıb yalnız heyrətlənirlər.
Deyilənə görə, AŞ PA-nın ölkəmiz üzrə sabiq həmməruzəçisi Andreas Qrossdan Azərbaycanda nəyə heyrətləndiyini soruşduqda içveçli deputat toylarımızı göstərib. Azərbaycan toylarında onu heyrətləndirən isə məhz yekə-yekə kişilərin qadınları ilə birlikdə yeyib-içib topa şəklində meydana girib oynaması, qarınlarını bir-birinə sürtə-sürtə əcaib rəqslər etməsi və bu prosesin 6-7 saat ərzində dəfələrlə təkrarlanması olub.
Bu eybəcərliyi görmək üçün toylarımıza kənardan 5 dəqiqə tamaşa etmək kifayətdir.
Qeyd edim ki, bu biabırçılıq yalnız avropalıları deyil, bizim geridə qalmış hesab etdiyimiz ölkələrin nümayəndələrini də heyrətləndirir.
Xarici şirkətdə çalışan tanışlarımdan birinin söylədiyinə görə, onların iş yoldaşlarının toyunda iştirak edən hindlinin məclisdə baş verənləri seyr etdikdə gözləri bərələ qalıb. Xüsusən də topa şəklində durub oynayan kişilərimizin öz xanımlarını da bu içkili kütlənin ortasında rəqs etdirməsinə Hindistandan gəlmiş şəxs məəttəl qalıb. Bildirib ki, onlarda toya dəvət etdikləri rəqqasələr oynayır və məclisdə iştirak edənlər də onlara baxıb əylənir.
Şou müğənnisinin fonoqramla oxumasına bu qədər xərc cəkməyə dəyərmi?
Bu gün toy mərasimlərində adi toy mədəniyyətinin əriyib getməsi də narahatçılıq doğuran məsələdir. Toylara insan həm də musiqi dinləmək, mənəvi zövq almaq üçün gedir. Amma akustik normalara riayət olunmaması ucbatından müasir toylarda ancaq başağrısı tapmaq olur. Ucadan səsləndirilən musiqinin səsi heç bir normalara uyğun gəlmir ki, bu da toya gələn qonaqların gərgin vəziyyətdə qalmasına səbəb olur. Toydan evə dönəndə elə yorğun olursan ki, sanki saatlarla həm zehni, həm də fiziki işlə məşğul olmusan!
Musiqiçilər də toyda ifrat dərəcədə soyğunçuluqla məşğuldurlar. Burada da təqsir əsasən toy sahibinin üzərinə düşür. Guya hansısa bir şou müğənnisi gəlib fonoqramla iki mahnı oxumasa, toy maraqsız keçəcək. Elə buna görə də deyəndə ki, filan müğənni toya 15 min dollara gedir, təəccüblənməməliyik. Günah özümüzdədir. “5 qəpiklik” səsi olmayan müğənniləri toya gətimək üçün yarışa çıxanda təbii ki, onlar da 10 mindən, 15 mindən dəm vuracaqlar. Burda şadlıq evlərinin sahiblərinin də müəyyən rolu var. Belə müğənniləri toy sahiblərinə zorla sırıyan da bəzən şadlıq evlərinin sahibləri olur. Hansı ki, bu mügənnilərə də sponsorluq edirlər. Təbii ki, camaatın hesabına...
Yesən də budur, yeməsən də!
Toylarımızda xariciləri heyrətləndirən yalnız bizlərin sürü şəklində ortaya düşüb əcaib rəqslər etməyimiz, müğənnilərə öz dəyərlərindən artıq pul verib toya dəvət etməyimiz deyil. Həm də süfrəyə düzülən yeməklərin, içkilərin həddən artıq çoxluğudur. Buna bolluq demək olmaz. İsrafçılıqdır. Bunun nə toy sahibinə, nə də toyda iştirak edənə bir xeyri var. Yeməklərin çoxluğu, başqa sözlə desək, menyünün zənginliyi də şadlıq evinin sahibinin cibini doldurmaq üçün vasitədir. Əksər şadlıq evlərində hətta toy sahibinn nəyisə menyüdan çıxartmasına belə imkan verilmir. Açıq bildirilir ki, daha yığcam menyü ilə toy sifarişi onlara sərf etmir.
Bakıda şadlıq sarayları çoxdur, ancaq demək olar ki, hamısının prinsipləri eynidir. Toy etmək üçün öncə seçəcəyin zala tamaşa edirsən. Sonra adminstratorla görüş gəlir. Adminstrator qardaş özünü elə aparır ki, adam sanki dövlət orqanlarında işləyən yüksək məmurun qarşısında dayandığını fikirləşir. Adamla elə danışıb elə hipnoz edirlər ki, deyirsən, gərək mən toyumu burada edim, yoxsa bunlardan canımı qurtara bilmərəm. Razılaşırsan. Sonra gəlir ilk dəqiqləşdiriləsi iş - adamların sayı. Eşidəndə ki, adamının sayı azdır, qiymətləri lap da qaldırırlar.
Toy sahibi öz maddi durumuna baxıb 30 növ yeməkdən və salatdan bir neçəsini ixtisara salmaq fikrinə düşsə də, restoran sahibləri bununla qətiyyən razılaşmırlar. Hərçənd bu salatlardan hətta yarısının ixtisar edilməsi nə süfrəyə xələl gətirər, nə də restoran sahibinin biznesinə.
Deyirsən ki, “qardaş başına dönüm, mənim imkanım çatmır, gəl sən menyüdən kələm salatını, çuğundur salatını çıxar”. Deyir, “sənə görə öz imicimi aşağı sala bilmərəm. Yesən də budur, yeməsən də”. Sonra deyirsən ki, “yaxşı mən öz qonaqlarıma spirtli içki verməyəcəyəm, menyüdən onu çıxar”, çıxarır, amma qiymətə elə bir təsiri olmur.
Əgər şadlıq evi çəkdiyi xərcə adekvat gəlir götürsəydi, onun üçün menyünün nə böyüklükdə olmasının elə də fərqi olmazdı. Deməli, menyünü şişirtməklə şadlıq evləri toy sahiblərini və eləcə də toyda iştirak edənləri soymaq məqsədi güdürlər. Hansı ki, bu menyüyə daxil edilən yeməklərin bir çoxu köhnə, bir gün əvvəlki toydan qalan olur.
Şadlıq evinin mətbəxində nə baş verir?
Şadlıq evlərində bir toydan qalan yeməklər növbəti toya qədər soyuducuda saxlanılır. Bəzən iki həftə, 20 gün eyni yeməklər hər gün stola qoyulur, sonra soyuducuya qaytarılır. Bunu adının çəkilməsini istəməyən şadlıq evlərindən birinin adminstratoru da bizimlə söhbətində təsdiqlədi. Müsahibimiz şadlıq evlərinin bəzi fırıldaqlarını da açıqladı: «Əvvəldən ucuz toyuq budları alınıb qızardılır, toyuqlar doğrananda yarıbayarı budla əvəz olunur. Bir neçə vedrə çörək axşamdan isladılır, səhərisi gün çəkilmiş ətə qarışdırılır. Biləklərimiz qırılır onu ətlə qarışdıranda. Sizə hələ lobyalı salatdan deyim. Lobya axşamdan isladılanda 10 dəqiqəyə bişir. Amma burada bir vedrə lobya bişirilib soyuducuya qoyulur, lazım olduqca istifadə olunur. İçkilərin əksəriyyəti şadlıq evlərinin zirzəmisində bağlanılır. Toy sahibinin sifariş etdiyi içkinin markasına uyğun şüşələrə doldurulub stolun üstünə qoyulur».
Qeyd edək ki, şadlıq evlərinin sahibləri toylardan maksimum gəlir əldə etmək məqsədilə menyüdə olan məhsulların keyfiyyətinə məhəl qoymur.
Şadlıq evləri toy sahiblərilə niyə müqavilə bağlamır?
Ancaq heç nəyə baxmadan yeməyə köklənmiş toy iştirakçılarının məhsulların keyfiyyətinə o qədər də ciddi fikir verməməsi sonda toylarda faciələrə səbəb olur. Ötən dövr ərzində toylarda çoxsaylı zəhərlənmə hallarının baş verməsi və də bunun nəticəsidir.
Bunun kökündə iki amil dayanır: birincisi istehlakçıların öz hüquqlarını bilməməsi və ya bilib də onlara barmaqarası münasibət bəsləməsi, ikincisi isə xidmət göstərənin (konkret halda «şadlıq evi»nin) qanunlarla üzərinə qoyulmuş vəzifələri yerinə yetirməməsi.
Məhz bunların məntiqi nəticəsidir ki, çağdaş Azərbaycanda xidmət göstərən («şadlıq evi») istehlakçı (mərasim quran) ilə xidmətin göstərilməsi barədə müqavilə bağlamır!
Amma «İstehlakçıların hüquqlarının müdafiəsi haqqında» Qanunun 8-ci maddəsinə görə «...istehsalçı və ya icraçı istehlakçı ilə işlərin icra edilməsi və xidmət göstərilməsi üçün müqavilə bağlamağa borcludur». Müqavilənin bağlanmaması isə məsələn, istənilən sayda «mərasim»i (toyu, ad gününü və s.) rəsmi qeydiyyatdan (mühasibat uçotundan, statistik hesabatdan və vergi ödəmələrindən) yayındırmağa geniş imkan yaradır. Təəssüf ki, təcrübədə bu məqama diqqət yetirən olmur. Müvafiq dövlət qurumlarının isə (İqtisadi İnkişaf Nazirliyi, Standartlaşdırma, Metrologiya və Patent üzrə Dövlət Komitəsi və sair) isə bu istiqamətdə konkret fəaliyyəti müşahidə olunmur.
Vəziyyət vergiçilərə də «gün kimi aydındır» - onlar da susur! Fəqət, bu susqunluğun təmənnasız olduğu heç inandırıcı deyil.
Ancaq nə buna görə məsuliyyətə alınan var, nə də bağlanan şadlıq evi. Bu da səbəbsiz deyil. Məsələ ondadır ki, bu şadlıq evlərinin əksəriyyətinin arxasında iri məmurlar dayanır. Məhz onların səyi nəticəsində bu sektorda dövr edən pullar vergidən də yayındırılır. Bu haqda danışmazdan əvvəl bir faktı xatırlatmaq istərdim.
Hər il yüz milyonlarla manat büdcədən gizlədilir
Bir neçə il əvvəl Tacikistan prezidenti İmomali Raxmonov keçirdiyi müşavirədə dövlət məmurlarını dəbdəbəli mərasimlər (toy, yas, ad günü və s.) keçirməkdə qınayıb və onları belə «əyləncə»lərdən çəkinməyə çağırıb. Bu zaman, Tacikistan prezidenti belə bir fikir də səsləndirib ki, hər il ölkəsində dəbdəbəli mərasimlərin keçirilməsindən əldə olunan 1 milyard dollar vəsait dövlətdən yayındırılır və ayrı-ayrı məmurların cibinə axır...
El arasında deyildiyi kimi, «sağ əli bizim başımıza», amma yox, hər ikisi! Nədən ki, bir tərəfdən Azərbaycanda «milyonçu» məmurların sayı Tacikistandandakından onqat artıqdır, bir tərəfdən bizim məmurların «kapital ehtiyatı» tacik məmurunku ilə müqayisəyəgəlməz dərəcədə çoxdur, o biri tərəfdən isə Azərbaycanda fəaliyyətdə olan şadlıq evlərinin, restoranların, kafelərin sayı hər cür əndazəni çoxdan aşıb. İndi bu ölkədə addımbaşı «şadlıq evi»nə rast gəlinir. Sanki Azərbaycan insanının işi-gücü yalnız «şadlıq etmək»dən ibarətdir!
Şadlıq etmək və şadlıq edənə xidmət göstərmək hər kəsin şəxsi işidir - nə cəmiyyətin, nə də dövlətin qanunları bunları qadağan etmir. Amma şadlıq edənin iqtisadi və sağlamlıq hüquqları, şadlıq edənə xidmət göstərənin isə fəaliyyətinin aşkarlığı və təhlükəsizliyi dövlətin qanunları ilə qorunur.
Ölkəmizdə fəaliyyətdə olan şadlıq evlərinin hamısı «göz qabağında» olsa da, fəaliyyətində aşkarlıq, leqallıq və təhlükəsizlik nisbəti ən yaxşı halda, 50 faiz təşkil edir. Bura ən müxtəlif məsələlər daxildir - şadlıq evinin əsl sahibinin adının gizli saxlanmasından tutmuş, burada dövr edən vəsaitin, göstərilən xidmətin keyfiyyətinin gizlədilməsinə qədər. Seqmentin dərinliklərinə nüfuz etdikcə, yeni və daha maraqlı mətləblərin şahidinə çevrilmək olar. Məsələn, ötəri bir araşdırma aparılsa, məlum olar ki, ölkəmizdə fəaliyyətdə olan «şadlıq evləri»nin gerçək sahibləri iri məmurlardan (nazirlər, icra başçıları, polis rəisləri, prokurorlar və s.) ibarətdir!
Əslində indi Azərbaycanda məmurla iş adamı arasındakı sərhəd tamamilə «əriyib yoxa çıxıb». Qısası, Azərbaycanda fəaliyyət göstərən «şadlıq evləri»nin hər birinin arxasında məmur dayanır. Məhz bu amil də həmin obyektlərin fəaliyyətində qeyri-leqallığın nitsbətinin 80, bəzi hallarda isə həttə 90-95 faizə çatmasını mümkün edib.
Hər il büdcədən milyardlar yayındırılır
Əslində ölkə iqtisadiyyatında, kütləvi istehlak malları sektorunda «kölgə iqtisadiyyatı»nın nisbəti böyük olduğu bir zamanda, şadlıq evlərinin 100 faiz leqal fəaliyyət göstərməsi də qeyri-mümkündür. Bunun da başında inhisarçı məmur təbəqəsi dayanır ki, burda da məqsəd bu sahədən gələn pulların da şəxsi ciblərinə axmasını təmin etməkdir. Bu vəsait isə heç də az deyil. Sadə hesablamalar gösətərir ki, söhbət 100 milyonlardan gedir.
Diqqət edin, şadlıq evlərində orta hesabla toy sahibindən adambaşı 40 manat alınır. Orta hesabla bir toyda iştirak edənlərin sayının 300 nəfər olduğunu götürsək, bu 12 min manat edər. Məhərrəmlik və orucluq aylarını çıxmaq şərtilə ilin 10 ayının hər günü şadlıq evlərinin bütün zalları tutulu olur. Bunu nəzərə alsaq, şadlıq evlərinin bir zaldan ay ərzində təxminən 300 min, il ərzində isə 3 milyon manat vəsait götürdüyünü söyləyə bilərik. Bakıda yüzlərlə şadlıq evi fəaliyyət göstərir ki, onların əksəriyyətinin 3-4 zalı var və hər gün toy şənliyi keçirilir. Belədə bir şadlıq evinin illik dövriyyəsinin orta hesabla 7-8 milyon manat arasında olması şübhə doğurmur. Bunun müqabilində onların dövlətə ödədiyi vergilər qəpik-quruşdu. Adının çəkilməsini istəməyən şadlıq evinin sahibi hər ay 150 min manata yaxın vergi ödədiklərini, bir o qədər də qeyri-rəsmi ödənişlərinin olduğunu bildirir.
Belədə bir şadlıq evinin ildə azı 5-6 milyon manat qazandığını söyləyə bilərik. Ölkədəki şadlıq evlərinin sayını nəzərə alsaq, bu rəqəmin milyardlarla manata çatdığı şübhə doğurmaz.
Əslində bir neçə il əvvəl kasıb Tacikistanda toy biznesindən əldə olunan və dövlətdən gizlədilən kapitalın məbləği 1 milyard dollar olubsa, Azərbaycanda bu rəqəmin dəfələrlə artıq olmasında təəccüblü nəsə axtarmağa da dəyməz!
Bəs, bu pullar kimlərin çibinə axır? Əlbəttə ki, bəzi məmurların! İndi hamı bilir ki, filan şadlıq evi kimindir və s. Düzdür, bu şadlıq evləri rəsmi sənədlərdə məmurların adına deyil. Hətta bəlkə hansısa məcburi köçkünün adınadır. Ancaq onların kimə məxsus olması ilə bağlı ölkə ictimaiyyəti arasında konkret formalaşmış fikir var.
Deməli, bu sahədən qazanılan pullar da dolayısıyla, ya birbaşa bəzi məmurların cibinə axır. Elə ölkə vətəndaşlarının açıq soyulmasını şərtləndirən «toy biznesinin» qarşısının alınmamasının səbəbini də burda axtarmaq lazımdır.
Məmurlar qazansa da, itirən vətəndaşla yanaşı, həm də dövlətdir ki, hər il büdcəsindən 100 milyonarla manat vəsait yayındırılır. Deməli, vəzifəsi dövlətin büdcəsini doldurmaqdan ibarət olan yüksək çinli Azərbaycan məmuru, əksinə, büdcəyə axmalı olan pulların istiqamətini öz cibinə doğru dəyişməklə məşğuldur!
Bütün bunlar hər gün hər kəsin müşahidə edə biləcəyi qədər populyar hala gəlmiş patalogiyadır və hamının da bundan xəbəri var. Qarşısını alan isə hələlik yoxdur. Zaman-zaman həyəcan təbili çalınsa da, vəziyyət düzəlmir ki, düzəlmir. Hətta bir ara məsələ Milli Məclisdə də müzakirəyə cıxarıldı. Deputatlar, ictimaiyyət nümayəndələri Azərbaycanda əvvəl-axır bu istiqamətdə konkret kriteriyalar müəyyənləşdirilməli olduğunu deyirlər. Qeyd edilir ki, həm toy, həm də hüzn mərasimləri ilə bağlı normal münasibətlər ortaya qoyulmalı, hər mərasim öz çərçivəsində icra olunmalıdır. Ancaq əməli işə gəldikdə heç kim iş görmür. Görünür daha güclü dairələr bunun qarşısını alırlar. Niyə də almasınlar, böyük pullar qazanırlar axı.
Əslində burda da Azərbaycanda ziyalı probleminin olması önə çıxır. Xalqa nümunəni ziyalısı, nüfuzlu şəxsləri göstərməlidir. Onlar özlərində cəsarət tapıb əsl Azərbaycan mədəniyyətini özündə əks etdirən bir toy mərasimi keçirməlidirlər. Əks halda bir qədər sonra eşidəcəyik ki, bəy gəlini şadlıq evində girov qoyub Rusiyaya pul dalınca gedib.
Modern.az saytı üçün
“AzMedia” Analitik İnformasiya Agentliyi
