Rusiya Federal Təhlükəsizlik Xidməti Krım körpüsündə baş vermiş partlayışın təşkilatçısının Ukrayna Müdafiə Nazirliyinin Baş Kəşfiyyat İdarəsinin rəhbəri Kirill Budanov olduğunu açıqlayıb.
Modern.az bildirir ki, bu barədə FTX-nin İctimaiyyətlə Əlaqələr Mərkəzindən (CSP) TASS-a məlumat verilib.
"Federal Təhlükəsizlik Xidməti İstintaq Komitəsi ilə birlikdə müəyyən edib ki, Krım körpüsündəki terror aktının təşkilatçısı Ukrayna Müdafiə Nazirliyinin Baş Kəşfiyyat İdarəsi və bu qurumun rəhbəri Kirill Budanov olub", - rəsmi açıqlamada deyilir.
Bildirilir ki, FTX Krım körpüsündə terror aktının hazırlanmasında iştirak etmiş 12 nəfəri müəyyən edib və artıq onlardan 9-u saxlanılıb.
"Hazırda cinayət işi çərçivəsində hadisədə iştirak etmiş beş Rusiya, üç Ukrayna və bir Ermənistan vətəndaşı saxlanılıb", - Xidmətin İctimaiyyətlə Əlaqələr Mərkəzinin yaydığı açıqlamada qeyd olunub.
Məlumata əsasən, hücum üçün istifadə edilən bomba kamuflyaj edilib. Partlayıcı maddələr Odessadan Bolqarıstan, Gürcüstan və Ermənistan vasitəsilə Krıma göndərilib.
Xatırladaq ki, oktyabrın 8-də Krım körpüsündə baş verən partlayışda 4 nəfər həlak olub. Faciə qurbanları partladılmış yük maşınının yanında gedən minik avtomobilinin sərnişinləri olub. Rusiya körpüdəki partlayışın terroru aktı olduğunu elan edib.
