Türkiyə prezidenti Rəcəb Tayyib Ərdoğanın sözçüsü İbrahim Kalın Yunanıstan baş naziri Kirakos Miçotakisə təşəkkür edib.
Modern.az xəbər verir ki, Kalın bu gün tviterdə Miçotakisin 3 gün əvvəlki paylaşımına cavab yazıb.
"İçimizi kədərlə dolduran görüntüləri, bizi ümidlə dolduran görüntülər izləyir. Xilasetmə qruplarının insanüstü səylərinə tək kəlmə ilə sayğı duyuruq. Yunanlar və türklər yan-yana həyat xilas etmək üçün birlikdə savaşırlar. Etdiklərinə görə onlara minnətdarıq", - deyə Yunanıstan baş naziri yazmışdı.
"Cənab baş nazir, bütün dəstəkləriniz üçün təşəkkür edirik", - deyə Kalın Miçotakisə cavabında bildirib.
Qeyd edək ki, Türkiyədə baş vermiş zəlzələ ilə bağlı bu ölkəyə yardım göndərən dövlətlərdən biri də Yunanıstandır. Fevralın 6-da yerli vaxtla saat 4:17-də Türkiyənin Kahramanmaraş vilayətinin Pazarcık rayonunda 7,7 bal, saat 13:24-də isə Elbistan rayonunda 7,6 bal gücündə iki zəlzələ qeydə alınıb. Son məlumata əsasən, zəlzələ nəticəsində 17 674 nəfər həyatını itirib, 72 879 nəfər isə yaralanıb.
Sayın Başbakan. Tüm destekleriniz için teşekkür ediyoruz.
— İbrahim Kalın (@ikalin1) February 10, 2023
