NATO-nun baş katibi Yens Stoltenberq brifinq keçirib.
Modern.az TASS-a istinadən xəbər verir ki, Stoltenberq bir sıra mühüm açıqlamalar verib.
"NATO hesab edir ki, ABŞ-ın üzərindəki naməlum şarlar Çin və Rusiyanın artan kəşfiyyatının təzahürüdür. Müdafiə nazirləri Brüsseldə alyansın hərbi-sənaye imkanlarını və sualtı mühüm infrastrukturu qorumaq imkanlarını müzakirə edəcəklər. NATO Ukraynadakı münaqişənin hazırkı mərhələsini “logistika müharibəsi” hesab edir və Kiyevə texnika və sursatların daha tez göndərilməsini zəruri hesab edir. NATO ölkələrinin Ukraynaya sursat tədarükü onların istehsal imkanlarından dəfələrlə çoxdur, alyans istehsalı genişləndirməlidir", - baş katib bildirib.
"NATO alyans ölkələrinin sualtı kabellərinin və boru kəmərlərinin mühafizəsini təmin etmək üçün koordinasiya mərkəzi yaradacaq. Həmçinin kəşfiyyat məqsədləri üçün mülki və hərbi peyk məlumatlarını birləşdirən virtual şəbəkə yaradılacaq. Ukraynaya təyyarələrin tədarükü məsələsinə NATO müdafiə nazirlərinin Brüsseldə keçiriləcək iclasında baxılacaq, lakin bu, çox vaxt apara bilər. Ukraynaya təyyarələrin çatdırılması NATO-nu münaqişə tərəfi etməyəcək. NATO hazırkı münaqişəyə hər hansı şəkildə son qoyulandan sonra Ukraynada daha da güclü ordunun yaradılmasını zəruri hesab edir", - deyə o əlavə edib.
