Özbəkistan Respublikasının Prezidenti Şavkat Mirziyoyev martın 1-də Amerika Birləşmiş Ştatlarının dövlət katibi Antoni Blinkenin başçılıq etdiyi nümayəndə heyətini qəbul edib.
Modern.az xəbər verir ki, bu barədə Özbəkistan Prezident Administrasiyasının rəsmi saytında məlumat verilib.
Bildirilib ki, siyasi, ticarət-iqtisadi, investisiya, təhsil, mədəni və humanitar sahələrdə ikitərəfli münasibətlərə aid gündəlikdə duran aktual məsələlərin geniş spektri, o cümlədən regional əməkdaşlığın əsas aspektləri nəzərdən keçirilib. Söhbətin əvvəlində dövlət katibi Antoni Blinken ABŞ Prezidenti Co Baydenin salamlarını və xoş arzularını Mirziyoyevə çatdırıb.
ABŞ-ın Özbəkistanın müstəqilliyi, suverenliyi və ərazi bütövlüyünü dəstəkləmək üçün qətiyyətli dəstəyi bir daha vurğulanıb. Görüşdə Özbəkistan-ABŞ çoxşaxəli münasibətlərinin yüksək səviyyədə olduğu böyük məmnunluqla ifadə olunub.
Genişmiqyaslı əməkdaşlığın, o cümlədən səmərəli strateji tərəfdaşlıq dialoqunun təşviqi və müxtəlif səviyyələrdə məhsuldar mübadilələrin davam etdirilməsi çərçivəsində daha da inkişaf etdirilməsinin vacibliyi bir daha qeyd olunub.
