Rusiya İstintaq Komitəsinin Bolqoqrad idarəsinin və Daxili İşlər Nazirliyi Volqoqrad vilayəti Baş İdarəsinin əməkdaşları azərbaycanlı biznesmen Zülfüqar Əsədovu güllələməkdə şübhəli bilinən iki nəfəri saxlayıblar. Modern.az-ın Rusiya mediasına istinadən verdiyi xəbərə görə, qətldə təqsirkar bilinənlərdən biri 25 yaşlı yerli sakin, digəri onun 27 yaşlı dostudur.
Şübhəlilərdən birinin əmisi oğlu 2014-cü ildə Əsədova qarşı sui-qəsd uğurlu nəticələnməsə də, həbs edilib. Azərbaycanlı biznesmenə birinci sui-qəsd cəhdindən sonra cinayətkarlar saxlanılaraq azadlıqdan məhrum ediliblər.
Gənclər cinayəti həyata keçirmək üçün avtomobil icarəyə götürərək, Əsədovun yaşadığı yerə gəliblər. Onlar burada gözləyiblər, Əsədov avtomobilindən düşəndə avtomat silahdan ən azı 9 dəfə atəş açıb, hadisə yerindən uzaqlaşıblar.
Saxlanılanlardan biri günahını tam boynuna alıb.
Zülfüqar Əsədov bu il sentyabrın 26-da axşam saatlarında güllələnib. İstintaqın versiyasına görə, qara geyimdə olan maskalı qatil biznesmenin avtomobilinin gəlməsini gözləyib. Killer onu güllələyəndən sonra aradan çıxıb.
Modern.az
