Nardaran kəndinin 500-dən çox abonentinin qazla təminatı bu gün bərpa ediləcək.
Bu haqda Modern.az saytına məlumat verən “Azəriqaz” İstehsalat Birliyinin mətbuat xidmətinin rəhbəri İbrahim Kərbalayev hazırda işçilərlə birlikdə kənddə olduğunu bildirib: “Texniki baxış keçirilən, qanunsuz xətlərdə təmizləmə aparılan, sayğacları quraşdırılan, yeni müqavilələr bağlanan mənzillərə təbii qazın verilişi bərpa ediləcək”.İbrahim Kərbalayev qeyd edib ki, digər məhəllələrdə də işlər davam etdirilir:
“Növbəti günlərdə mənzillərin qazla təminatının bərpası davam etdiriləcək”.
Yay aylarından qazdan qeyri-qanuni istifadə hallarına görə təxminən 2 min abonenti olan Nardaran kəndinə mavi yanacağın verilməsi dayandırılıb.
Prezident İlham Əliyev Bakının Nardaran qəsəbəsinin abadlaşdırılması, qəsəbədəki sosial-mədəni infrastrukturun yenilənməsi, qəsəbənin sosial problemlərinin həlli məqsədilə 12 milyon manat məbləğində vəsait ayrılması üçün sərəncam imzalayıb.
Gülşən RAUFQIZI
