“Günəşli” yatağının 10 saylı stasionar dərin dəniz özülündə baş vermiş qəza nəticəsində həlak olan neftçilərin xatirəsinə dərin ehtiramla ithaf edirəm
Kədər, gəl yaxına
Gəl, söhbət edək
Gəl, qoşa ağlayaq
Birgə dərdləşək.
Gəl, kədər, qəlbimi
açım mən sənə
Hisslərim çevrilib indi
qəhərə...
Səbəb ki bəllidir
Bilirsən özün!
Gəl, bir də deyim,
Deyim dərdimi.
Deyim ki, məni
gör neçə gündür ki,
sən tərk etmirsən
Gəl sənə söyləyim
çətinliyimi...
Deyim ki, dözmürəm sınıq taleyə,
Arxasız, dayaqsız evə dözmürəm!
Deyimmi, bilirsən axı sən özün?!
Körpələr gülsünlər
istəyirəm mən!
Analar saçını yolmasın,
nolar?!
Bacılar qardaşa həsrət qalmasın!
Gəlinlər dul adı daşımasınlar!
Uşaqlar atasız olmasınlar qoy!
Kədər, yaxına gəl,
sözümü eşit!
Bu dərdi-ələmi tökmə üstümə
Gəl, sən bir yola gəl,
axı nolar?!
Gözlərə həsrətlə ələnmə bir də!
Nolar, küdurətin götür,
uzaq ol!
Kədər, uzaq dolan sən buralardan
Gör neçə taledə sən
qurdun yuva?!...
