Fəaliyyətinə xitam verilən Milli Təhlükəsizlik Nazirliyinin bazasında yeni yaradılan Dövlət Təhlükəsizlik Xidmətinin (DTX) strukturunun necə olacağı barədə ilk rəsmi məlumat açıqlanıb. Modern.az saytı xəbər verir ki, bu barədə DTX-in ictimaiyyətlə əlaqələr şöbəsinin rəhbəri vəzifəsini icra edən Arif Babayev ANS telekanalına müsahibəsində məlumat verib.

A. Babayev vurğulayıb ki, DTX-in strukturunda regional idarələr yaradılacaq. Bu isə o deməkdir ki, DTX-in MTN kimi rayon şöbələri olmayacaq.  

“DTX-nin bütün istiqamətlərdə fəaliyyətinin optimallaşdırılması planlaşdırılır. Bununla əlaqədar olaraq struktur dəyişiklikləri aparılır. Regional idarələrin yaradılması nəzərdə tutulur. Xidmətin strukturu daha çevik və operativ olacaq”-Arif Babayev deyib.  

Onun sözlərinə görə, paralel olaraq DTX-nin kadr potensialı məsələsi də həll edilir.

“Xidmətə xarici dil bilən gənc əməkdaşlar işə götürüləcək. Bundan əlavə əvvəllər bəlli səbəblərə görə işdən kənarlaşdırılmış peşəkarlar yenidən işə cəlb olunacaq. Xidmətin ştat vahidi MTN-in ştat vahidindən az olacaq”-A.Babayev deyib.  

DTX rəsmisinin dediyinə görə bu struktur Xarici Kəşfiyyat Xidməti ilə Azərbaycanın maraqları naminə öz fəaliyyətini koordinasiya edəcək.  

Modern.az