Geridə qoyulacaq 2015-ci il Türkiyənin həyatında bir çox önəmli hadisələrlə yadda qaldı. Modern.az Almaniyanın “Tagesspiegel” jurnalına istinadən xəbər verir ki, jurnalistlər Türkiyənin qarşıdakı ildə bir çox sınaqlarla üzləşəyini yazıb:
“2016-cı ilin rahat keçəcəyi ilə bağlı Türkiyə rəhbərliyi elə də böyük ümid bəsləmir. PKK, Suriya, Avropa Birliyi, Rusiya: ötən il Türkiyə üçün ragat deyildi, gələn il də çətin ki, yaxşı olsun”.
Müəllif Tomas Saybert Türkiyənin bir neçə istiqamətdə, o cümlədən daxili siyasətdə çətinliklərlə üzləşəcəyini gözləyir:
“Çox güman ki, Türkiyə hakimiyyəti Rəcəb Tayyip Ərdoğanı tənqid edən jurnalistləri və digər hakimiyyət əleyhidarlarını təqib etməkdə davam edəcək. Dekabrda məlum oldu ki, “Bir gün” qəzetinin bir neçə əməkdaşı “Qatil və oğru Ərdoğan” məqaləsinə görə gözaltına alındılar”.
Jurnalist kürdlər və türklər arasındakı konfliktə də diqqət çəkir: “Suriya münaqişəsinə gəlincə, Türkiyə anlayır ki, Bəşər Əsəd rejiminin devrilməsindən sonra Suriyada sünnü dövlətinin qurulmasına yardım və ölkənin şimalında yeni kürd dövlətinin yaradılmasına mane olmaq niyyəti aparıcı oyunçular tərəfindən anlayışla qarşılanmayacaq”.
Jurnalistin fikrincə, təkcə Rusiya və İran deyil, Ankaranın NATO-dakı müttəfiqləri də Türkiyənin maraqlarını tam qəbul etmək istəmir:
“Məsələn, ABŞ İŞİD-lə mübarizədə Suriya kürdləri ilə əməkdaşlıq edir. Avropa Birliyi ilə münasibətlər də yaxşı deyil. Brüssel etiraf edib ki, avropalılar qaçıqn böhranından çıxmaq üçün Türkiyənin yardımına ehtiyac duyurlar. Amma Türkiyə Avropaya qaçqın axının azaldılması qarşılığında birliklə vizasız rejim və gələcəkdə üzvlük haqqı istəyir”.
Vüqar İsmayılov
