Yaxın zamanlarda Azərbaycanın bir neçə xarici ölkədə səfirliyi açılacaq. Bu barədə Modern.az saytına Xarici işlər Nazirliyinin mətbuat xidmətinin rəhbəri Elman Abdullayev bildirib:
“Hazırda xarici ölkələrdə səfirliklərimizin sayı artmaqdadır. Azərbaycanın xaricdə 75-ə yaxın diplomatik nümayəndəliyi var. Xarici ölkələrin, həm də beynəlxalq təşkilatların Azərbaycanda 55-dən çox diplomatik nümayəndəliyi var. Azərbaycan həm xaricdə, həm də Azərbaycanda diplomatik nümayəndəliklərinin sayını artırır. Azərbaycan Respublikasının əhəmiyyəti və beynəlxalq miqyasda nüfuzu artdıqca, özünəməxsus yeri genişləndikcə, ölkəmizdə xarici ölkələrin və təşkilatların diplomatik nümayəndəlikləri açılır”.
E. Abdullayev bildirib ki, yaxın zamanlarda Azərbaycanın Avstraliyada, Vyetnamda, Omanda və bir sıra ölkələrdə yeni səfirliklərinin açılması nəzərdə tutulur:
“Azərbaycanın xaricdə səfirliklərin açılması ilə bağlı prezidentimizin fərmanı var. Bu fərmana uyğun olaraq, bizim diplomatik nümayəndəliklərimiz açılır və ora müvafiq diplomatik personal təyin olunur”.
Xarici ölkələrin Azərbaycanda səfirliklərinin açılmasına gəldikdə isə mətbuat xidmətinin rəhbəri əlavə edib ki, bu istiqamətdə hələ ki, konkret hansısa ölkədə səfirliyin açılması barəsində məlumat yoxdur:
“Bu barədə dəqiq məlumat yoxdur, burada ölkələr arasında münasibətlərin genişlənməsi, beynəlxalq təşkilatların Azərbaycanda rolunun artmasını xüsusi qeyd etmək olar. Hər bir ölkə digər ölkələrdə səfirliyin açılmasını özü müəyyən edir və bundan sonra da bizə də məlumat verilir. Bu yaxınlarda ölkəmizdə Qırğızıstanın, Argentinanın səfirlikləri açılıb-deyə E. Abdullayev qeyd edib.
Nihadə Eyyubova
