Xəbər verildiyi kimi, hüquq müdafiəçisi Rüfət Səfərov ötən axşan saxlanılıb. Ona qarşı Cinayət Məcəlləsinin 221.1 (xuliqanlıq) və 178.3.2 (dələduzluq) maddələri ilə ittiham irəli sürülüb.
Rüfət Səfərovun saxlanıldığını təsdiqləyən Daxili İşlər Nazirliyinin Mətbuat xidmətindən bildirilib ki, torpaq alğı-satqısı ilə əlaqədar Rüfət Səfərovla bir nəfər arasında münaqişə yaranıb. Faktla bağlı Binəqədi RPİ-nin 5-ci polis şöbəsində araşdırma aparılır.
Qeyd edək ki, Rüfət Səfərov Müdafiə Nazirliyinin mətbuat xidmətinin keçmiş rəhbəri, sabiq deputat Eldar Sabiroğlunun oğludur.
Modern.az Rüfət Səfərovun saxlanılmasına atasının münasibətini öyrənməyə çalışıb.
Lakin telefona Eldar Sabiroğlu deyil, həyat yoldaşı Tahirə Tahirqızı cavab verib.
Tahirə Tahirqızı öncə həyat yoldaşının səhhəti ilə əlaqədar telefonlara cavab vermədiyini qeyd edib. Daha sonra oğlununa qarşı irəli sürülən ittihamların şər-böhtan olduğunu söyləyib:
“Rüfətə qarşı irəli sürülən ittihamlar qondarmadır, şər-böhtandır. Dekabrın 6-da Rüfət ABŞ-yə getməliydi, ora dəvət etmişdilər. Ona hüquq müdafiəçisi kimi mükafat vermişdilər. Buna görə də Rüfətin qarşısını kəsdilər. Torpaq alqı-satqısı ilə əlaqədar iddialar da yalandır. Bəhs olunan torpaq sahəsi hələ iki il bundan əvvəl satılıb. Bu məsələ ilə bağlı heç bir problem yoxdur. Həm də torpağı atası mənimlə bərabər satıb. Hər şey qanuni şəkildə olub və sənədləşdirilib. Bununla bağlı sənədlər var. İndi kimlərsə, həmin torpağı alan adamla işbirliyi qurub. Bu nanəcib də şər-böhtan atır ki, Rüfətə 60 min manat verib ki, həmin ərazidə qalan balaca bir cığırı da alsın. Atası həmin sahənin satılmasına razı deyildi. Guya bu adam Rüfətə 60 min verib ki, atasını razı salsın, o da həmin sahəni alsın. Amma yalandır! Şər-böhtanı heç olmasa, elə atsınlar ki, balaca uşaq da buna inansın”.
Tahirə Tahirqızı həyat yoldaşı Eldar Sabiroğlunun səhhətinin hazırda yaxşı olmadığını deyib. Onun sözlərinə görə, Rüfətin polis tərəfindən saxlanılması atasının halını pisləşdirib.
“Eldarın sağlamlıq vəziyyəti yaxşı deyil. Bu hadisə onun səhhətinə təbii ki, pis təsir edib. Eldar 6 aydan bir həkim müayinəsindən keçir, parkinson xəstəsidir. Ona rahatlıq, dinclik lazımdı. Amma nanəciblər qoymur ki, rahat yaşayaq".
Tahirə Tahirqızı bildirib ki, dünən axşam oğlu saxlanılandan sonra polis idarəsinə getsələr də, Rüfət Səfərovla görüşə bilməyiblər.
